АНУ-ын Кубад тавьсан хоригийг цуцлах НҮБ-ын тогтоолыг дэмжигчид 30 жилийн доод түвшинд хүрчээ
Кубын засгийн газар тогтоолыг дэмжихээ болиулахын тулд АНУ олон оронд дипломат шахалт үзүүлсэн гэж буруутгаж байна.
Euronews2 мин унших
Euronews
НҮБ-ын Ерөнхий Ассамблей АНУ-ын Кубад тавьсан хоригийг цуцлахыг дахин уриалсан ч тогтоолыг дэмжигчдийн тоо 30 гаруй жилийн хамгийн доод түвшинд хүрчээ. Энэ тухай Евроньюс мэдээлэв.
1992 оноос хойш бараг жил бүр өргөн баригдаж батлагддаг тогтоолыг энэ удаа 130 улс дэмжиж, 17 улс эсэргүүцэн, 25 улс түдгэлзжээ. Энэ нь 1995 оноос хойших хамгийн бага дэмжлэг юм. Өнгөрсөн жил 160 гаруй улс уг саналыг дэмжиж байв.
Герман, Итали, Латви 34 жилд анх удаа түдгэлзсэн бол Колумби, Коста-Рика, Эквадор, Марокко, Словени, Босни зэрэг хэд хэдэн улс ихэнх нь анх удаа эсэргүүцэж санал өгсөн байна. Хууль зүйн заавал биелүүлэх хүчингүй уг тогтоол олон улсын санаа бодлыг илэрхийлдэг гэж үздэг.
АНУ-ын хориг Фидель Кастрогийн хувьсгал, АНУ-ын өмчийг улсын болгосны дараа 1960 оноос эхэлжээ. Вашингтон газрын тосны нийлүүлэлтийг хязгаарлах, өргөн хүрээтэй хориг арга хэмжээ авах зэргээр Кубад дахин шахалт үзүүлж, тус улсын эдийн засагт ноцтой хохирол учруулаад байна.
Санал хураалтаас хэдхэн минутын өмнө АНУ-ын НҮБ дахь элчин сайд Майк Уолц Кубыг бүслэлтэд байгааг үгүйсгэж, «Кубын ард түмний зовлон зөвхөн энэ авлигад идэгдсэн коммунист дэглэмийн буруу» гэж мэдэгдсэн юм. Тэрбээр Кубын удирдагчид, тэр дундаа Ерөнхийлөгч Мигель Диас-Канелийг тансаг цаг зүүсэн зургуудыг өргөж харуулахад Кубын төлөөлөгчид ширээ тогшиж эсэргүүцжээ.
Кубын Гадаад хэргийн сайд Бруно Родригес Вашингтоныг улс орны хувь заяаг шийдэж, баялгийг нь булаан авахыг оролдож байна гэж буруутгав. Хуралдааны үеэр тэрбээр Уолц руу дөхөж очоод түүнийг худал хэлж байна гэж буруутгасан бол Уолц холдохыг хашгиран шаардсан байна.
Диас-Канел Икс сүлжээнд «Дэлхий нийт АНУ-ын хамгийн илэрхий шахалт, сүрдүүлгийг үл харгалзан бүслэлтийг эсэргүүцэж дахин дуу хоолойгоо өргөлөө» гэж бичжээ.
Трамп нэгдүгээр сард Кубад газрын тос нийлүүлдэг орнуудад тариф ногдуулна гэж сүрдүүлсний дараа тус улсад түлшний нийлүүлэлт эрс багасчээ. Үүний улмаас Кубад цахилгаан тасалдах, ус, интернет, утасны үйлчилгээ доголдох явдал түгээмэл болж, түлш болон өргөн хэрэглээний бусад барааны хомсдол үргэлжилж байна.
