ЕХ Канадад «гишүүнтэй адилтгах гишүүн» болох яриа хэлэлцээ эхлүүлэх саналаасаа ухарчээ

Европын холбоо Канадад холбоонд гишүүнтэй адилтгах гишүүн болох яриа хэлэлцээ эхлүүлэх саналаасаа ухарчээ. Энэ тухай Гардиан сонин мэдээлэв.

Гишүүн орнуудын хооронд санал зөрөлдөөн гарсан нь ЕХ, Канадын дээд хэмжээний уулзалт Монреалд эхлэх гэж байхад тохиосон юм. Пүрэв, баасан гарагт үргэлжлэх уулзалтын төгсгөлд гаргах хамтарсан мэдэгдлийн төсөлд Канадыг «бүрэн гишүүнчлэлээс доогуур түвшинд» ЕХ-нд улам ойртуулах тухай зөөлөрсөн томъёолол оржээ.

Европын комиссын дарга Урсула фон дер Ляйен өнгөрсөн сард холбооны байдлын тухай илтгэлдээ Канадад гишүүнтэй адилтгах статус олгох асуудлыг ЕХ авч үзнэ гэж зарлаж, бараг бүх хүнийг гайхшруулжээ. Энэ мэдэгдлийг 2013 онд Хорват элсэхээс хойш шинэ гишүүн аваагүй холбооны түүхэнд онцгой үйл явдал гэж үнэлж байв.

Гардианы олж үзсэн төсөлд талууд 2027 оны ЕХ, Канадын дээд хэмжээний уулзалт хүртэл Канадыг холбоонд улам ойртуулах үзэл баримтлалыг тодорхойлохоор ажиллана гэж заажээ. Гишүүнтэй адилтгах гишүүнчлэлийг өмнө нь Украин зэрэг оронд санал болгож байгаад татгалзаж байсан юм.

Фон дер Ляйений мэдэгдэл гишүүн орнуудын нийслэлүүдийг гэнэдүүлж, улс төр болон хууль эрх зүйн эсэргүүцэлтэй тулгарав. Ийм статус тодорхойлолтгүй учраас Канад Европын зөвлөл, хууль тогтоох байгууллага, шийдвэр гаргах үйл явцад саналын эрхгүйгээр оролцох эсэх зэрэг асуулт дипломатчдын дунд гарч байжээ. Даваа гарагт болсон хуралдаанаар ЕХ дахь элчин сайдууд фон дер Ляйенийг эвгүй байдалд оруулахгүйгээр саналыг буцаах дипломат арга замыг хайхаар тохирсон байна.

Герман улс гишүүнтэй адилтгах статусыг Украин, Монтенегро зэрэг ирээдүйн нэр дэвшигч орнуудад зориулсан түр шат байх ёстой бөгөөд одоогийн гэрээнүүдэд албан ёсны үндэслэлгүй гэж үзэж байв. «Фон дер Ляйений хамгийн ойрын ажилтнуудаас өөр хэнтэй ч энэ талаар зөвлөлдөөгүй бололтой. Герман зэрэг олон гишүүн орон сэтгэл дундуур байсан» гэж нэгэн дипломатч хэлсэн байна.

АНУ-ын Ерөнхийлөгч Дональд Трамп өмнө нь энэ саналыг «инээдтэй» гэж нэрлэж, үүнийг дайсагнасан үйлдэл гэж үзвэл АНУ Европтой олон зүйлээр худалдаа хийхээ зогсоож магадгүй гэж мэдэгдсэн юм. Канадын Ерөнхий сайд Марк Карни харин Канад ЕХ-нд албан ёсоор элсэх сонирхолгүй гэдгээ илэрхийлжээ. Тэрбээр мягмар гарагт энэ долоо хоногийн дээд хэмжээний уулзалт цаашид дахин нэг жил үргэлжлэх албан ёсны хэлэлцээний эхлэл болно гэж сэтгүүлчдэд ярьжээ.

Канадын томоохон банкуудын нэг болох Ти Ди Экономикс-ийн тайланд хамгаалалт, эрчим хүч, чухал ашигт малтмал, дижитал зах зээл зэрэг салбарт саад тотгорыг арилгавал Канад, Европын худалдаа хэдэн арван тэрбум доллараар нэмэгдэж болзошгүйг тооцоолжээ.