АНУ-ын шүүгч архаг өвчтэй хүмүүсээс чадвар алдалтаа нотлохыг шаардсан Медикэйдийн дүрмийг хориглов
Шийдвэр хүнд өвчтэй зарим хүнд ажлын шаардлагаас чөлөөлөгдөхөд хялбар болгох ч ажлын шаардлагыг өөрийг нь хууль бус гэж үзээгүй юм.
АНУ-ын холбооны шүүгч Ричард Стернс Медикэйд хөтөлбөрт хамрагддаг архаг өвчтэй хүмүүс ажлын шаардлагаас чөлөөлөгдөхийн тулд эрүүл мэндийн хувьд эмзэг гэдгээ нотлох ёстой гэсэн Трампын засаг захиргааны шинэ дүрмийг пүрэв гарагт хориглов. Энэ тухай Аль Жазира мэдээлэв.
Шүүгч зургадугаар сард засаг захиргааг шүүхэд өгсөн 25 муж болон Колумбийн дүүргийн талд гарчээ. Нэхэмжлэгчид уг дүрэм хүнд өвчтэй хүмүүсийн чөлөөлөлтийг хууль бусаар хязгаарлаж байна гэж үзсэн юм.
Хуулиар эрүүл мэндийн хувьд эмзэг хүмүүст хараагүй буюу хөгжлийн бэрхшээлтэй, донтолттой, хүнд сэтгэцийн эмгэгтэй, өдөр тутмын үйл ажиллагаа нь ихээхэн хязгаарлагдсан, эсвэл хүнд, нарийн төвөгтэй өвчтэй хүмүүсийг хамруулах ёстой.
Гэвч засаг захиргааны дүрэм эдгээр ангиллын хүмүүсээс өвчин нь ажлын шаардлагыг биелүүлэх чадварыг нь ихээхэн бууруулж байгааг нэмж нотлохыг шаардсан байна.
“Мужууд мөнгөн нөхөн төлбөрөөр нөхөгдөхгүй засаршгүй хохирол учирч байгааг харуулж чадсан” гэж Стернс 16 хуудас шийдвэртээ бичжээ.
Дүрмийг баталсан Медикэр ба Медикэйдийн үйлчилгээний төв тайлбар өгөхөөс татгалзав.
2027 оны нэгдүгээр сарын 1-нээс эхлэн Медикэйдийн өргөтгөлд хамрагдсан 19-64 насны хүмүүс сард дор хаяж 80 цаг ажилласан буюу олон нийтийн ажил хийсэн, эсвэл сургуульд хагас цагаас доошгүй сурч байгаагаа нотлох ёстой. Эрүүл мэндийн хувьд эмзэг, донтолтын эмчилгээнд хамрагдаж буй хүмүүс зэрэгт үл хамаарах заалт бий.
Массачусетсийн дүүргийн шүүгч Стернсийг Ерөнхийлөгч Билл Клинтон томилсон юм. Тэрээр мужуудын эсэргүүцсэн эрүүл мэндийн эмзэг байдлыг шалгах холбооны өөр хоёр хязгаарлалтыг хэвээр үлдээжээ.
Медикэйд бол муж болон холбооны засгийн газрын санхүүжүүлдэг, бага орлоготой хүмүүст зориулсан төрийн эрүүл мэндийн даатгалын хөтөлбөр юм.
