АНУ-ын шүүгч Трампын Би Би Си-гийн эсрэг гүтгэлгийн нэхэмжлэлийг хэрэгсэхгүй болгохоос татгалзжээ

АНУ-ын холбооны шүүгч Ерөнхийлөгч Дональд Трампын Би Би Си-гийн эсрэг гаргасан гүтгэлгийн нэхэмжлэлийг хэрэгсэхгүй болгох хүсэлтийг Мягмар гарагт хүлээн аваагүй тул хэрэг үргэлжлэх болжээ. Энэ тухай Си Би Эс Ньюс мэдээлэв.

Трамп 2025 оны 12 дугаар сард Их Британийн олон нийтийн өргөн нэвтрүүлгийн корпорацын эсрэг нэхэмжлэл гаргасан юм. Нэхэмжлэлд Би Би Си 2024 оны сонгуулиас долоо хоногийн өмнө цацсан Панорама нэвтрүүлэгтээ хоорондоо 55 минутын зайтай хоёр хэсгийг залгаж, энх тайванд уриалсан мэдэгдлийг нь хассан гэж буруутгажээ.

“Ерөнхийлөгч Трамп эдгээр нэхэмжлэлээ нотолж, хохирол амссанаа тогтоож чадах эсэхийг өөр өдөр шийднэ” гэж шүүгч Жеффри Кунц шийдвэртээ бичжээ. Трамп шийдвэрийг Трут Сошиал платформдоо Би Би Си-гийн эсрэг асар том ялалт гэж нэрлэсэн байна.

“Бид энэ шийдвэрт гайхаж байгаа ч шүүхийн эрх мэдлийг хүндэтгэж байна” гэж Би Би Си-гийн хэвлэлийн төлөөлөгч хэлээд, байр сууриндаа итгэлтэй байгаа бөгөөд хуулийн зохих журмаар хариу өгсөөр байх болно гэжээ.

Майамигийн холбооны шүүгч 10 дугаар сарын 22-нд Трамп 12 дугаар сарын 11 гэхэд Би Би Си-гийн өмгөөлөгчдөд мэдүүлэг өгөх ёстой, эс тэгвээс нэхэмжлэлийг хэрэгсэхгүй болгох зэрэг шийтгэл хүлээж болзошгүйг анхааруулсан юм. Ерөнхийлөгч 1 дүгээр сарын хоёр, гурав дахь долоо хоногт мэдүүлэг өгөх боломжтой гэж мэдэгдсэнийг Би Би Си дурджээ.

Би Би Си 2025 оны 11 дүгээр сард киноны засварын талаар Ерөнхийлөгчөөс уучлалт гуйсан ч гүтгэлгийн нэхэмжлэл гаргах үндэслэл байхгүй гэдэгтэй эрс санал нийлэхгүй байгаагаа мэдэгдэж байжээ.