Аудигийн гүйцэтгэх захирал Трампын сонгуулийн цуглаанд оролцсоноо ажилчдадаа захидлаар тайлбарлав
Компанийн ашиг сонирхлын үүднээс оролцсон гэж захирал тайлбарласан ч үйлдвэрчний эвлэлийнхэн түүнийг сонгуулийн кампанит ажилд идэвхтэй туслалцаа үзүүлсэн гэж буруутгав.
Германы Ауди компанийн гүйцэтгэх захирал Гернот Дёлнер АНУ-ын Ерөнхийлөгч Дональд Трампын сонгуулийн цуглаанд оролцож, компани тус улсад 4 тэрбум ам.долларын (5.1 тэрбум Сингапурын доллар) үйлдвэр барихаа зарласан нь автомашин үйлдвэрлэгчийн ашиг сонирхолд нийцсэн гэж мэдэгджээ. Энэ тухай Блүүмберг агентлагийн мэдээллийг Стрэйтс Таймс сонин нийтлэв. Хоёр эр АНУ-ын завсрын сонгуулиас хэдхэн хоногийн өмнө амралтын өдрүүдэд Жоржиа мужид нэг тайзан дээр гарсан нь Германд сонгуульд нэг талыг баримталсан хэмээн шүүмжлэл дагуулжээ.
Төслийн талаар хэлэлцээ хийхээр АНУ-д очсон захирал Блүүмберг агентлагийн олж үзсэн ажилчдад бичсэн захидалдаа компаниас үйлдвэрийн ажлыг эхлүүлэхийг Трамптай хамт зарлахыг хүссэн гэжээ. «Үүний зэрэгцээ энэ мэдэгдлийг улс төрийн байр суурь илэрхийлсэн гэж хүлээн авсныг бид ойлгож байна. Бид үүнд маш нухацтай хандаж байна» гэж Дёлнер бичжээ.
Жоржиа дахь үйлдвэрийн төслийг Аудигийн толгой компани Фольксвагены хяналтын зөвлөл батлах ёстой бөгөөд тэнд ажилчдын төлөөлөгчид суудлын талыг эзэлдэг. Трампын цуглааны эргэн тойронд үүссэн шуугиан энэ алхмыг хүндрүүлж, компанийг өөр зүйлд буулт хийхэд хүргэж мэднэ. Фольксваген, Ауди хоёр Германд ажилчидтайгаа цалин, хатуу хэмнэлтийн арга хэмжээний талаар хурцадмал хэлэлцээ хийж байна.
10 дугаар сарын 26-нд Ай Жи Металл үйлдвэрчний эвлэлийн тэргүүн, Фольксвагены хяналтын зөвлөлийн дэд дарга Кристиане Беннер Дёлнерийн оролцоог маш ичгүүртэй гэж нэрлэж, үйлдвэрийг барих эсэхэд ажилчдын нөлөө байгааг сануулжээ. «Гернот Дёлнер өөрийгөө болон Аудиг АНУ-д танилцуулсан арга нь маш ичгүүртэй, улс төрийн хувьд хүлээн зөвшөөрөшгүй бөгөөд компани, ялангуяа ажилчдад нь зохисгүй» гэж тэрбээр хэлэв.
Фольксвагены ажилчдын зөвлөлийн дарга Даниела Кавалло тус тусад нь Дёлнерийг сонгуулийн кампанит ажилд идэвхтэй туслалцаа үзүүлсэн гэж буруутгажээ. Түүний хэлснээр, Аудигийн дотоод журмаар сонгуулиас өмнөх гурван сарын турш сонгуульд нэр дэвшиж буй улс төрчидтэй олон нийтийн өмнө гарахыг хориглодог бөгөөд захирал хэдхэн сарын өмнө энэ зарчимд гарын үсэг зурсан байжээ.
Фольксваген өргөн хүрээний бүтцийн өөрчлөлтийн хэлэлцээний хүрээнд өмнө нь хааж болзошгүй гэж мэдэгдэж байсан Неккарсульм дахь Аудигийн том үйлдвэрийг өөр зорилгоор ашиглах боломжийг судалж байна. Гүйцэтгэх захирал Оливер Блюме ажлын байр, үйлдвэрийн зардлыг танаж, АНУ зэрэг өсөлттэй зах зээлд илүү их хөрөнгө оруулахыг зорьж байна. Европын хамгийн том автомашин үйлдвэрлэгч сул эрэлт, Хятадын ширүүн өрсөлдөөн, цахилгаан болон програм хангамжаар удирдагдах автомашинд шилжих өндөр зардалтай тэмцэж байна.
Ауди АНУ-д борлуулдаг автомашинуудынхаа ихэнхийг импортолсоор байгаа тул худалдааны бодлогын өөрчлөлтөд онцгой өртөмтгий бөгөөд гаалийн татвар Фольксвагены Хойд Америк дахь бизнесийн зардлыг аль хэдийн нэмэгдүүлжээ. Дёлнер 10 дугаар сарын 25-нд Ауди брэнд одоогоор АНУ-д алдагдалтай ажиллаж байгааг хэлсэн юм.
