Австралийн инфляц 4.3 хувьд хүрч, бодлогын хүүг энэ онд тав дахь удаагаа өсгөх вий гэсэн болгоомжлол нэмэгдэв

Австралийн инфляцын ерөнхий түвшин 4.3 хувь болж хурдассан бөгөөд үнийн огцом хэлбэлзэлтэй бүтээгдэхүүнийг хассан гол үзүүлэлт ч өндөр байгаа нь ирэх долоо хоногт бодлогын хүүг дахин өсгөх хүлээлтийг хурцатгажээ. Энэ тухай Гардиан сонин мэдээлэв. Австралийн Нөөцийн банкны илүүд үздэг үзүүлэлт болох суурь инфляц 9 дүгээр сар хүртэлх жилд 3.6 хувьтай гарсан байна.

Нөөцийн банкны албан тушаалтнууд инфляцын төлөв «мэдэгдэхүйц муудсан» гэх болгоомжлолыг дурдаж, үнийн өсөлтийг 2.5 хувийн зорилтот түвшин рүү буцаахын тулд зээлийн зардлыг цаашид өсгөх шаардлагатай байж магадгүйг тодорхой илэрхийлсээр ирсэн. Хэрэглээний үнийн индексийн мэдээ Төв банк 11 дүгээр сарын 3-нд мөнгөний бодлогын дараагийн шийдвэрээ гаргахаас өмнөхөн гарсан бөгөөд ихэнх эдийн засагч бодлогын хүүг дахин өсгөнө гэж таамаглаж байна.

Нөөцийн банкны дэд ерөнхийлөгч Эндрю Хаузер мэдээ гарсны дараахан лхагва гарагт Сенатын төсвийн хэлэлцүүлэг дээр инфляцын үзүүлэлтийг «хэт өндөр» гэж тодорхойлов. Түүний хэлснээр, урт хугацааны инфляцын хүлээлт нэмэгдэж, инфляцыг системээс гаргахад улам хэцүү болох «хар дарсан зүүд» мэт эрсдэл байна. Орон сууцны зээл зэрэг зээлийн хүүд нөлөөлдөг бодлогын хүү аль хэдийн 4.6 хувьд хүрч, сүүлийн 15 жилийн хамгийн өндөр түвшинд байгаа юм.

Австралийн Статистикийн товчооны лхагва гарагт нийтэлсэн мэдээгээр, өдөр тутмын бараа, үйлчилгээний үнэ өсөхийн зэрэгцээ ажилгүйдэл нэмэгдэж, өрхүүдийн амьдралыг хүндрүүлж байна. Тээврийн зардал сүүлийн 12 сард 8.7 хувиар өссөн нь АНУ, Израилийн Ираны эсрэг мөргөлдөөнөөс үүдэлтэй шатахууны үнийн өсөлттэй голчлон холбоотой. Хүнсний үнэ жилийн дотор 3.2 хувиар, орон сууцны зардал 5.2 хувиар өсчээ.

Товчооны мэдээллээр, хэрэглээний үнийн индексийн хамгийн том ангилал болох орон сууц жилийн инфляцад хамгийн их нөлөө үзүүлж, удаах нь тээврийн зардал байв. Барилгачид шинэ орон сууцны материал, ажиллах хүчний өртгийн өсөлтийг үнэд шингээж байгаа бөгөөд цахилгааны үнэ ч өндөр байна. Өсөн нэмэгдэж буй зардал нь сонгогчид амьжиргааны өртгийн дарамтад сэтгэл дундуур байгаагаа илэрхийлж буй Австрали болон бусад оронд улс төрийн түгшүүрийг өдөөж байна.