Австралийн Виктория мужид амралтын өдрүүдэд зам тээврийн осолд зургаан хүн амиа алджээ
Бямба гарагт л гэхэд явган зорчигч, мотоциклчин зэрэг дөрвөн хүн амиа алджээ.
Австралийн Виктория мужид Баасан гарагаас хойш гарсан хэд хэдэн зам тээврийн ослын улмаас зургаан хүн амиа алдаж, дөрвөн хүн хүнд шархаджээ гэж Эй Би Си Ньюс мэдээлжээ. Нас барагсдын гурав нь мотоциклчин байна.
Баасан гарагийн үдээс хойш Футскрэйд 25 настай мотоциклчин уулзвар дээр машинтай мөргөлдөж нас барсан бөгөөд 59 настай жолоочийг баривчилж, байцаасны дараа суллажээ. Мөн орой 7:15 цагийн орчим Хилсвиллийн Блэк Спурт 21 настай мотоциклчин машинтай мөргөлдөж, газар дээрээ нас баржээ.
Бямба гарагийн үд дунд Варнамбулын ойролцоох Деннингтонд явган хүний гарцаар гарч явсан 75 настай эмэгтэйг машин мөргөж, тэрбээр газар дээрээ нас баржээ. 53 настай жолоочоос цагдаа мэдүүлэг авах юм.
Орой 6:20 цагийн орчим Нунавадингийн 26 настай эрэгтэй Блэйргоуригийн ойролцоо мотоциклийн жолоодлогоо алдаж, модонд мөргөн нас барсан бөгөөд 29 настай зорчигчийг амь насанд аюултай гэмтэлтэй эмнэлэгт хүргэжээ. Бараг тэр үед Мэрибороод хоёр машин мөргөлдөж, 47 настай жолооч нас барж, 75 настай зорчигч хүнд гэмтжээ.
Нэг цаг хагасын дараа Мельбурны баруун хэсгийн Веррибид ачааны машины жолооч модонд мөргөж нас барсан бөгөөд түүний хэн болох нь тогтоогдоогүй байна.
Энэ онд Виктория мужийн замд 227 хүн амиа алдсан нь өнгөрсөн оны мөн үеэс 20-оор цөөн байна. Мөн цагдаа Бямба гарагт Жилонгийн ойролцоо цахилгаан дугуй, машин мөргөлдөж, 17 настай хүү амь насанд аюултай гэмтэл авсан хэргийг шалгаж байна.
