Бахрейн Ирантай холбоотой террорист бүлгийн гишүүдэд 15 жилээс бүх насаар нь хорих ял оноов
Мөрдөн шалгалтаар зарим шүүгдэгч Иран болон IRGC-тэй холбоо барьж байсныг тогтоосон гэж прокурорууд мэдэгджээ.

Бахрейны эрүүгийн шүүх даваа гарагт Ираны Исламын хувьсгалт харуулын корпустай (IRGC) холбоотой террорист бүлэг байгуулж, удирдсан хэрэгт гэм буруутайд тооцсон шүүгдэгчдэд 15 жилээс бүх насаар нь хорих ял оноосныг прокурорууд мэдэгдлээ.
Шүүх мөн зарим шүүгдэгчийг 100 мянган бахрейн динараар (265 мянган ам.доллар) торгож, 8 сая гаруй динарыг хурааж буяны үйлсэд зориулах, мөн бусад хураагдсан эд зүйлсийг хураан авахыг тушаасан гэж прокурорууд төрийн мэдээллийн агентлаг Bahrain News Agency-гээр нийтэлсэн мэдэгдэлдээ дурджээ.
Хэрэг үндсэн хуулийг алдагдуулж, Бахрейны төрийн тогтолцоог түлхэн унагахыг зорьсон гэх бүлэгтэй холбоотой гэж мэдэгдэлд дурдсан байна. Мэдэгдэлд хэдэн хүнийг шүүсэн тухай дурдаагүй ч мэдээллүүдэд хэдэн арван хүн гэж дурджээ.
Иран хоёрдугаар сарын сүүлээр болсон АНУ, Израилийн агаарын цохилтын хариуд Персийн булангийн орнууд руу пуужин, нисгэгчгүй онгоцоор дараалан цохилт өгөхөд Америкийн томоохон цэргийн баазтай Бахрейн ихээхэн хохирол амссан юм. Ираны халдлага эхэлсний дараа Бахрейн Тегераныг үймээн самуун дэгдээж байна гэж буруутгасан юм. Бахрейны дотоод хэрэгт хөндлөнгөөс оролцсон гэх буруутгалыг Иран өмнө нь үгүйсгэж байсан.
Хэдэн долоо хоног цохилтгүй байсан Бахрейн ням гарагт Ираны шууд халдлагад дахин өртсөн нь гурван хоногт хоёр дахь удаа болжээ. IRGC “АНУ-ын цэргийн илт түрэмгийлэл”-ийн хариуд Риффа агаарын бааз руу зургаан нисгэгчгүй онгоц харваж, бай оносон гэж мэдэгджээ. Бахрейны агаарын довтолгооноос хамгаалах систем Ираны хэд хэдэн агаарын халдлагыг саатуулж, ирж буй нисдэг биетүүдийг устгасан гэж тус улс мэдэгдэв.
Мөрдөн шалгалтаар бүлэг зорилгодоо хүрэхийн тулд терроризм ашиглаж, үйл ажиллагаагаа дэмжих хөрөнгө босгосон, зарим шүүгдэгч Бахрейны ашиг сонирхолд хохирол учруулах зорилгоор Иран, IRGC-тэй холбоо барьж байсныг тогтоосон гэж Бахрейны прокурорууд мэдэгджээ.
Прокурорын газрын мэдээллээр бүлэг террорист үйлдэл, үймээн самуун, хорлон сүйтгэх ажиллагааг өдөөх зэрэг хууль бус аргаар тус улсын төрийн тогтолцоог хүчээр өөрчлөхийг зорьжээ. Мөн үндэсний байгууллагуудаас илүү Ираны засаглалын тогтолцоонд улс төрийн үнэнч байхыг номлодог Велаят-е факих буюу Исламын хуульчийн асран хамгаалалт гэх үзэл баримтлалыг гишүүд нь сурталчилсан гэж прокурорын газар буруутгажээ.
Мэдэгдэлд дурдсанаар бүлэг энэ үзэл баримтлалыг мөргөлийн газруудаар дамжуулан түгээж, нийгэм, буяны болон боловсролын байгууллагад нөлөөлөхийг зорьжээ. Мөн гишүүдийг шашны номлолоор Иранд үнэнч байхыг сурталчилж, Бахрейны засгийн газрыг эсэргүүцэхийг өдөөж, хорлон сүйтгэх ажиллагааг дэмжсэн гэж буруутгажээ.
Мөрдөн шалгалт, аюулгүй байдал болон санхүүгийн шалгалтаар зөвшөөрөлгүй босгосон, бүлгийн үйл ажиллагааг санхүүжүүлэхэд ашигласан хөрөнгө илэрсэн гэж прокурорын газар мэдэгдэв. Эрх баригчид бахрейн динар болон бусад валютаар нийт бараг 935 мянган динартай тэнцэх бэлэн мөнгө, мөн баримт бичиг, хэвлэл, цахим төхөөрөмж хураан авсан гэж мэдэгдэлд дурджээ.
Прокурорын иш татсан бусад нотлох баримтад зарим шүүгдэгчийнх гэх номлолын бичлэг, бүлгийн удирдагчид болон IRGC, Ираны тагнуулын албаны гишүүдийн хоорондын холбоо, байцаалтын үеэр зарим шүүгдэгчийн өгсөн мэдүүлэг багтжээ. Шүүх хуралдаанд хоригдож буй бүх шүүгдэгчийн өмгөөлөгчид оролцож, шүүх яллах болон өмгөөлөх талын гэрчүүдийн мэдүүлгийг сонссон гэж прокурорууд мэдэгдэв. Бахрейны Хүний эрхийн үндэсний байгууллагын төлөөлөгч мөн шүүх хуралдааныг хянахаар оролцсон байна.


