Бангладешийн сөрөг хүчний удирдагч Ганга мөрний усны шударга гэрээ байгуулахыг шаардав

Бангладешийн Үндэсний иргэний намын удирдагч Нахид Ислам Энэтхэгт тус улсаар дамжих транзит коридор олгохыг эсэргүүцэж, 12 дугаар сард хугацаа нь дуусах Ганга мөрний гэрээний оронд Шинэ Делитэй усны шударга гэрээ байгуулахыг шаарджээ гэж Зэ Хинду сонин орон нутгийн хэвлэлийг иш татан мэдээлжээ.

Нахид Ислам 10 дугаар сарын 30-нд Дакад болсон, хэдэн зуун дэмжигч оролцсон жагсаалд ингэж мэдэгджээ. Жагсаал нь хууль, дэг журам сахиулж, хий, цахилгааны хомсдолыг шийдэж чадаагүй гэх үндэслэлээр Дотоод хэргийн сайд Салахуддин Ахмед, Эрчим хүчний сайд Икбал Хасан Махмуд Тукуг огцрохыг шаардах зорилготой байжээ.

Тэрбээр Ерөнхий сайд Тарик Рахманы засгийн газрыг Энэтхэгт тус улсаар дамжих транзит коридор олгохыг оролдож байна гэж буруутгажээ. «Бангладешийн ард түмэн ийм хууль бус коридорыг хүлээн зөвшөөрөхгүй» гэж Нахидыг бидиньюс24 сайт иш татжээ.

Нахидын нам нь 2024 оны 7-8 дугаар сард Ерөнхий сайд Шейх Хасиныг огцроход хүргэсэн оюутны хөдөлгөөний удирдагчдын 2025 оны 2 дугаар сард байгуулсан нам юм.

Рахман 10 дугаар сарын 26-29-нд Японд айлчилж, хоёр орон Бенгалын булангийн аж үйлдвэрийн өсөлтийн бүсийн санаачилгыг стратегийн хамтын ажиллагааны шинэ санаачилга болгон өргөжүүлэхээр тохиролцсон юм. Япон мөн Бангладешийн зүүн өмнөд хэсэгт Матарбари гүн усан боомт байгуулахад санхүүжилт олгож байна.

Гэвч Бангладешийн Гадаад хэргийн төрийн сайд Хумаюн Кобир айлчлалын үеэр гуравдагч орны асуудлыг хэлэлцээгүй гэж мэдэгджээ. Харин Энэтхэгийн Гадаад хэргийн яамны хэвлэлийн төлөөлөгч Рандхир Жайсвал 10 дугаар сарын 28-нд Энэтхэг зүүн хойд мужуудыг хамарсан санаачилга зэргээр Японтой түншлэлээ улам бэхжүүлнэ гэж мэдэгдсэн байна.

«Энэ удаа бид Ганга мөрний усны гэрээнд өөрсдийн шударга хувиас өчүүхэн ч ухрахгүй» гэж Нахид хэлжээ.

1996 оны 12 дугаар сарын 12-нд байгуулсан 30 жилийн хугацаатай гэрээ нь Баруун Бенгал дахь Фаракка далангаас 1 дүгээр сараас 5 дугаар сар хүртэлх ширгэлтийн улиралд Ганга мөрний усыг хуваах журмыг тогтоодог. Энэтхэг хоёр орны дундын 54 голын асуудлыг 1972 онд байгуулсан Голын хамтарсан комиссоор хэлэлцдэг гэж мэдэгдэж ирсэн юм.