Бинанс биржийн хулгайн дараа Сөүл Вашингтон, Токиотой хамтран Пхеньянд шахалт үзүүлэх ёстой гэж шинжээч үзжээ

АНУ-ын блокчейн тагнуулын «Ти Ар Эм Лабс» компанийн бодлогын асуудал хариуцсан дэлхийн тэргүүн Ари Редборд Хойд Солонгосын криптовалютын хулгайг сөрөхийн тулд Өмнөд Солонгос улс АНУ, Японтой хамтын ажиллагаагаа бэхжүүлэх ёстой гэж Ёнхап агентлагт бичгээр хариулсныг Кореа Таймс сонин мэдээлжээ.

АНУ-ын Холбооны мөрдөх товчоо дэлхийн хамгийн том криптовалютын бирж болох «Бинанс»-аас зургаан тэрбум гаруй ам.долларын криптовалют хулгайлсан хэрэгт Хойд Солонгосыг буруутгасан. Пхеньян уг буруутгалыг няцааж, өөрийн эсрэг «ноцтой улс төрийн өдөөн хатгалга» гэж нэрлэжээ.

«Хориг арга хэмжээ хакерын халдлагыг зогсоодоггүй ч хулгайлсан хөрөнгийг бэлэн мөнгө болгох зардлыг нэмэгдүүлдэг» гэж Редборд хэлжээ.

Тэрбээр шахалтад олон талт болон дангаар тавих хориг, Хойд Солонгос болон түүнд туслагч Хятадын талуудад үзүүлэх дипломат шахалт, Пхеньяны түшиглэдэг Хятадын мөнгө угаах сүлжээний эсрэг арга хэмжээ багтана гэж тайлбарлажээ.

Редбордын хэлснээр Өмнөд Солонгосын санхүүгийн зохицуулагчид хэргийн дараа криптовалютын биржүүдийг хурдан цуглуулж аюулгүй байдлыг хянасан ч хууль бус гүйлгээг хаах ажлын хурд, уялдаа дутагдалтай байжээ.

Өмнөд Солонгосын Нэгдлийн яам хулгайн нөхцөл байдлыг бүрэн тогтоогоогүй тул хориг арга хэмжээний талаарх хэлэлцүүлэг эхлээгүй гэж Пүрэв гарагт мэдэгджээ. Гадаад хэргийн яам дангаар тавих кибер хориг зэрэг нэмэлт арга хэмжээг дотооддоо судалж байгаа ч шийдвэр гаргаагүй байна.