Хойд Солонгос мөнгө угаахтай тэмцэх байгууллагыг АНУ-ын дайсагнасан бодлогод үйлчилж байна гэж буруутгажээ

Хойд Солонгос Баасан гарагт мөнгө угаахтай тэмцэх олон улсын байгууллагыг өөрийг нь хар жагсаалтад үлдээсэн хэмээн буруушааж, тус байгууллагыг АНУ-ын дайсагнасан бодлогод үйлчилж байна гэж мэдэгдсэнийг Кореа Таймс сонин мэдээлжээ.

Санхүүгийн арга хэмжээ авах ажлын хэсэг 10 дугаар сарын сүүлээр Парист болсон хурлаараа Хойд Солонгосыг арга хэмжээ авахыг уриалсан өндөр эрсдэлтэй харьяаллын жагсаалтад үлдээхээр шийдсэн. Энэ ангилалд мөнгө угаах, терроризмыг санхүүжүүлэх, зэвсэг түгээхээс сэргийлэх тал дээр ноцтой дутагдалтай орнууд багтдаг.

«Ажлын хэсэг хуйвалдагч бүлэг, АНУ-ын дайсагнасан бодлогод үйлчилдэг туйлын улстөржсөн байгууллага болон хувирчээ» гэж Хойд Солонгосын Гадаад хэргийн яамны төлөөлөгч Солонгосын Төв Телеграфын Агентлагаар нийтлэгдсэн мэдэгдэлдээ дурджээ.

Тэрбээр мөнгө угаах, терроризмыг санхүүжүүлэх, хар тамхины наймаа, хуурамч мөнгө үйлдвэрлэхтэй Пхеньян ямар ч холбоогүй гэж мэдэгдэж, улсынхаа нэр хүнд, эрх ашгийг зөрчих өчүүхэн ч оролдлогыг тэвчихгүй гэжээ.

Ажлын хэсэг цахим хуудсандаа Пхеньян мөнгө угаах, терроризмыг санхүүжүүлэхээс сэргийлэх тогтолцооныхоо ноцтой дутагдлыг арилгаж чадахгүй байгаад санаа зовж буйгаа илэрхийлжээ. Мөн үй олноор хөнөөх зэвсэгтэй холбоотой хууль бус үйл ажиллагааных нь ноцтой аюулд санаа зовж байгаа аж.

Эдийн засгийн хамтын ажиллагаа, хөгжлийн байгууллагын дэргэд ажилладаг тус ажлын хэсэг Хойд Солонгосыг 2011 оноос хойш өндөр эрсдэлтэй харьяалал гэж ангилсаар иржээ.