Хойд Солонгос Японы батлан хамгаалахын зардлыг нэмэх оролдлого ард түмэнд нь дарамт болно гэж шүүмжилжээ

Хойд Солонгос Баасан гарагт Японы батлан хамгаалахын зардлыг нэмэх оролдлогыг шүүмжилж, энэ нь Японы эдийн засгийн сэргэлтийн хэтийн төлөвийг бүрхэгдүүлж, ард түмэнд нь «хүнд зовлон» учруулна гэж мэдэгдсэнийг Кореа Таймс сонин мэдээлжээ.

Хойд Солонгосын Гадаад хэргийн яамны харьяа Японы судлалын хүрээлэнгийн судлаач Солонгосын Төв Телеграфын Агентлагаар нийтлэгдсэн нийтлэлдээ ингэж шүүмжилжээ. Токио батлан хамгаалахын зардлаа ирэх таван жилд бараг хоёр дахин нэмэхээр судалж байна гэсэн мэдээллийн дараа энэ шүүмжлэл гарсан юм.

Судлаач Японы энэ алхмыг «цаг үеэ олоогүй тооцоо» гэж нэрлэж, улсын аюулгүй байдлыг нь улам дордуулна гэжээ.

Хойд Солонгос Японы цэргийн хүчээ бэхжүүлэх төлөвлөгөөнд эмзэг ханддаг. Энэ нь бүс нутгийн зэвсгийн уралдааныг хурцатгаж, Токиогийн өнгөрсөн милитаризмыг сануулна гэж Пхеньян үздэг. Япон 1910-1945 онд Солонгосын хойгийг колоничилж байжээ.

Ройтерс агентлагийн Даваа гарагийн мэдээгээр Япон 2027 оны 4 дүгээр сараас эхлэх таван жилийн батлан хамгаалахын зардлыг 2023 санхүүгийн жилээс хэрэгжиж буй одоогийн төлөвлөгөөнийхөөс 1.8 орчим дахин нэмэхээр судалж байна.