Хойд Солонгосын парламент Дээд ардын хурлын дэд даргыг огцруулж, хоёр хуульд өөрчлөлт оруулжээ

Хойд Солонгосын Дээд ардын хурлын Байнгын хорооны бүгд хурал Пүрэв гарагт болж, хурлын дэд даргын нэгийг огцруулж, хоёр хуульд өөрчлөлт оруулсныг тус улсын хэвлэл Баасан гарагт мэдээлсэн тухай Кореа Таймс сонин мэдээлжээ.

15 дугаар Дээд ардын хурлын Байнгын хорооны хоёрдугаар бүгд хурлыг дэд дарга Ким Хён Сик даргалсныг Солонгосын Төв Телеграфын Агентлаг мэдээлжээ. Хурлаар дэд даргын нэг болон хорооны нэг гишүүнийг эгүүлэн татсан ч хэн болох, шалтгааныг нь мэдээлээгүй байна.

Байнгын хороо Ким Хён Сик, Ри Сон Гвон гэсэн хоёр дэд даргатай бөгөөд Ким хурлыг даргалсан тул Ри Сон Гвоныг огцруулсан байж магадгүй юм.

Ри Сон Гвон 3 дугаар сард Байнгын хорооны дэд даргаар томилогдсон. Тэрбээр өмнө нь Эх орноо энхийн замаар нэгтгэх хорооны дарга, 2020-2022 онд Гадаад хэргийн сайд, Өмнөд Солонгостой харилцах асуудал хариуцсан Нэгдсэн фронтын хэлтсийн даргаар ажиллаж байжээ.

Хорооноос барилгын тухай болон үнэт металлын менежментийн тухай хуульд нэмэлт өөрчлөлт оруулах зарлиг баталсан ч өөрчлөлтийн агуулгыг ил болгоогүй байна.

Барилгын хуулийн өөрчлөлт Ким Чен Ын удирдагчийн 2024 онд эхлүүлсэн бүс нутгийн хөгжлийн бодлоготой холбоотой байж болох юм. Энэ бодлогоор 10 жилийн турш жил бүр 20 хот, дүүрэгт орчин үеийн үйлдвэр, эмнэлэг болон бусад үйлчилгээний байгууламж барих зорилттой.