Өмнөд Солонгос Солонгосын дайнд оролцсон гадаадын ахмад дайчдыг дурсгалын өдөрт урьжээ

Өмнөд Солонгосын Ахмад дайчдын яам 1950-1953 оны Солонгосын дайнд оролцсон гадаадын ахмад дайчид, тэдний гэр бүлийнхнийг жил бүрийн дурсгалын өдөрт урьж байгаагаа Баасан гарагт мэдэгдсэнийг Кореа Таймс сонин мэдээлжээ.

Яамны мэдээлснээр зургаан орны 36 хүн гэр бүлийнхний хамт Ням гарагт ирж, зургаан өдөр айлчлах юм. НҮБ-ын ахмад дайчдыг дурсах олон улсын өдрийг жил бүрийн 11 дүгээр сарын 11-нд тэмдэглэдэг.

Урилгаар ирэх хүмүүсийн дунд 1953-1955 онд Британийн армид алба хааж, дайнд илгээх гадаадын цэргүүдийг сургаж байсан 97 настай Уильям Уолш байна.

Мөн 2007 онд айлчлалын хөтөлбөрийг анх санаачилсан Канадын ахмад дайчин Винсент Кортни, Батлан хамгаалахын олзлогдогсод, сураггүй алга болсон цэргийн албан хаагчдын асуудал хариуцсан агентлагийн захирал Келли Маккиг нар ирэх долоо хоногт ирнэ. Хөтөлбөрт Бусан дахь НҮБ-ын дурсгалын оршуулгын газар, Сөүлийн Ёнсан дахь Солонгосын дайны дурсгалын музейд зочлох ажил багтжээ.

Бусан дахь оршуулгын газарт НҮБ-ын тугийн дор Өмнөд Солонгосын цэргүүдтэй мөр зэрэгцэн тулалдсан 14 орны 2254 цэрэг нойрсож байна. Дайны үед 22 орноос 1.98 сая цэрэг илгээгдсэний 40 803 нь амь үрэгдэж, 103 460 нь шархадсан, 3950 нь сураггүй алга болж, 5819 нь олзлогджээ.