БРИКС-ийн парламентын форум Баруун Ази дахь дайсагналд гүнээ санаа зовж байгаагаа илэрхийлэв
Ираны парламентын тэргүүн айлчлалаа цуцалсан ч Арабын Нэгдсэн Эмират Улсын хууль тогтоогч Палестин улс хэрэгтэй болсныг онцолжээ.
БРИКС-ийн орнуудын парламентын удирдагчид Баруун Азид хурцадмал байдал, дайсагнал нэмэгдэж байгаад гүнээ санаа зовж байгаагаа илэрхийлж, бүс нутагт тогтоосон нэг талын албадлагын арга хэмжээ, эдийн засгийн хоригийг олон улсын эрх зүйд харшилсан гэж шүүмжилжээ. Энэ тухай Хинду сонин мэдээлэв. Энэтхэгийн парламентын доод танхимын дарга Ом Бирлагийн удирдсан хоёр өдрийн 12 дахь удаагийн БРИКС-ийн парламентын форум мягмар гарагт өндөрлөж, гаргасан хамтарсан тунхаглалдаа Израиль, Палестины мөргөлдөөнийг хоёр улсын шийдлээр зохицуулах шаардлагатайг дахин онцолжээ.
«Бид Ойрхи Дорнод, Баруун Азид хурцадмал байдал үргэлжлэн хурцдаж байгаад гүнээ санаа зовж байгаагаа илэрхийлж, үндэсний байр сууриа сануулахын хамт хамгийн их тэвчээр гаргаж, нөхцөл байдлыг улам хүндрүүлж болох үйлдлээс зайлсхийхийг уриалж байна» гэж хамтарсан тунхаглалд дурджээ. Ираны парламентын төлөөлөгчдийн тэргүүн Мохаммад Багер Галибаф Саудын Араб, хуситуудын хооронд дайсагнал нэмэгдсэнтэй холбогдуулан Энэтхэгт хийх айлчлалаа цуцалсан нь уулзалтад анхаарал татсан юм.
Галибаф ирээгүй ч форум Баруун Азийн оролцогч талуудад санал солилцох боломж олгосон бөгөөд Арабын Нэгдсэн Эмират Улсын Батлан хамгаалах, дотоод хэрэг, гадаад харилцааны хорооны дарга Али Рашид Аль Нуайми зэрэг бүс нутгийн бодлого боловсруулагчид оролцжээ. 2 дугаар сарын 28-нд эхэлсэн АНУ-ын тэргүүлсэн халдлагын хариуд Иран Персийн булангийн энэ улсыг довтолсноор Арабын Нэгдсэн Эмират Улс, Ираны харилцаа эрс муудсан юм.
Аль Нуайми сэтгүүлчдэд Израилийн ашиг сонирхолд хохирол учруулахгүйгээр Израиль, Палестины хямралыг хоёр улсын шийдлээр зохицуулахыг хүчтэй дэмжиж байгаагаа хэлэв. Түүний хэлснээр, 160 орчим улс Израилийг хүлээн зөвшөөрдөг бөгөөд энэ бол бүс нутгийн бодит байдал ч эмгэнэлт нөхцөл байдал Палестин улс хэрэгтэйг харуулсан тул хоёр улсын шийдлийн хэлэлцээг сэргээх хэрэгтэй.
Тунхаглалд Палестины ард түмний өөрийгөө тодорхойлох, эрх чөлөө, бие даасан, тусгаар улстай байх эрхийг баталж, АНУ, Израилийн Ираны эсрэг халдлагыг шууд нэрлэлгүйгээр олон улсын эрх зүй, НҮБ-ын дүрмийн зарчмыг алдагдуулж буй хууль бус арга хэмжээг зогсоохыг уриалжээ. Мөн терроризмын үйлдлийг гэмт хэрэг, зөвтгөх аргагүй гэж буруушааж, 2025 оны 4 дүгээр сарын 22-нд Кашмирын Пахалгамд болсон террорист халдлагыг хамгийн хатуугаар буруушаасан бөгөөд НҮБ-ын хүрээнд олон улсын терроризмын тухай иж бүрэн конвенцийг түргэн батлахыг уриалав.
