Египт тэргүүлэх бие даасан хэвлэлийн ерөнхий редактор Лина Атталаг шүүх хурлын дараа саатуулжээ
Хүний эрхийн байгууллагууд энэ шүүх хурлыг Египт хэвлэлийн эрх чөлөөг хязгаарлаж буй аюултай хурцдал гэж үзэж байна.
Египтийн тэргүүлэх бие даасан Мада Маср мэдээллийн сайтын ерөнхий редактор, сэтгүүлч Лина Атталаг мягмар гарагт яаралтай шүүх хурлаар торгосны дараа аюулгүй байдлын хүчнийхэн саатуулжээ. Энэ тухай Африканьюс сайт Мада Маср сайтын мэдээлэлд тулгуурлан мэдээлэв.
Тус хэвлэлийн мэдээлснээр, ганц удаагийн хэлэлцүүлгийн дараа зөрчлийн хэргийн шүүх сайтыг хааж, Атталаг тусгай зөвшөөрөлгүйгээр ажиллуулсан хэргээр 850 орчим еврогоор торгожээ. Дараа нь хамгаалалтын ажилтнууд түүнийг бүсэлж, газраас өргөн шүүхийн танхимаас гаргасан бөгөөд тэрбээр шүүхийн байранд хоригдсон хэвээр байна гэж Мада Маср мэдээлэв.
Шүүх хуралд байлцсан Египетийн хувь хүний эрхийн санаачилга байгууллагын захирал Хоссам Бахгатын хэлснээр, шүүгч өмгөөлөгчдийн хашгираан, эсэргүүцлийн дунд шийдвэрээ уншсан бөгөөд удалгүй Атталаг саатуулжээ. Хүний эрхийн байгууллагууд энэ шүүх хурлыг Египт хэвлэлийн эрх чөлөөг хязгаарлаж буй аюултай хурцдал гэж тодорхойлсон байна.
Энэ явдал баримт шалгах чиглэлийн өөр нэг онлайн платформ болох Матсадаашийн сэтгүүлчдийг баривчилснаас хэдхэн долоо хоногийн дараа болжээ. Тэдний сэтгүүлчдийг худал мэдээлэл тараасан, Лалын ахан дүүс бүлэглэлтэй холбоотой гэж буруутгасан бөгөөд засгийн газрыг шүүмжилдэг гэж үзэгддэг хэвлэлүүдэд ийм буруутгал байнга тулгардаг.
Энэ нь сүүлийн зургаан жилд Аттала болон Мада Маср сайттай холбоотой зургаа дахь хэрэг бөгөөд өмнөх хэргүүдийн аль нь ч шүүх хуралд хүрч байгаагүй юм. Хэвлэлийн эрх чөлөөг хязгаарласан хэмээн удаа дараа шүүмжлэгдсэн Египт одоогоор ажлаасаа болж 26 сэтгүүлчийг хорьж байгааг Египетийн хувь хүний эрхийн санаачилга мэдээлэв.
