Чипийн экспорт огцом өссөн ч Өмнөд Солонгосын хувийн хэрэглээ буурчээ

Кореа Таймс сонины мэдээлснээр, Өмнөд Солонгосын эдийн засаг хагас дамжуулагчийн экспортын огцом өсөлтийн ачаар өсч байгаа ч хэрэглэгчид үүний үр шимийг мэдэрч чадахгүй байна. Солонгосын банкны мягмар гарагт нийтэлсэн гуравдугаар улирлын урьдчилсан мэдээгээр хувийн хэрэглээ өмнөх улирлаас 0.2 хувиар буурсан нь 2023 оны хоёрдугаар улирлаас хойших анхны бууралт юм.

Хувийн хэрэглээний өсөлт эхний улиралд 0.6 хувь, хоёрдугаар улиралд 0.4 хувь болж саарсаар гуравдугаар улиралд сөрөг гарчээ. Автомашин, гэр ахуйн цахилгаан бараа зэрэг бараа, санхүүгийн болон хоолны газрын үйлчилгээ зэрэг үйлчилгээний зардал аль аль нь буурсан байна. Энэ хооронд эдийн засаг гуравдугаар улиралд өмнөх улирлаас 1 хувиар өсч, төв банкны 0.3 хувийн таамаглалаас давжээ.

Төв банк хувийн хэрэглээ буурсныг хөрөнгийн зах зээл сул байгаагаас хувьцааны арилжааны хэмжээ буурч, санхүүгийн үйлчилгээний зардал багассантай нэг талаар холбон тайлбарлажээ. Мөн 8 дугаар сард Хёндэ Мотор компанийн ажилчид арван жилд анх удаа бүх нийтээр ажил хаясан нь автомашин нийлүүлэлтийг саатуулсныг дурджээ.

«Өрхийн өндөр өр, хүн амын хөгшрөлт зэрэг бүтцийн хүчин зүйлийн улмаас хувийн хэрэглээ төдийлөн сэргэхгүй байна. Ирэх оны эхний улиралд хувийн хэрэглээ аажмаар сэргэнэ гэж бид хүлээж байна» гэж Солонгосын банкны эдийн засгийн статистикийн газрын дарга И Дон Вон хэлжээ. Ойрхи Дорнод дахь удаан үргэлжилсэн мөргөлдөөнөөс үүдэлтэй инфляц, хөрөнгийн зах зээлийн хэлбэлзлийн дунд хэрэглээ тогтвортой сэргэх эсэх нь тодорхойгүй хэвээр байна.

Төв банкны хэрэглэгчийн сүүлийн судалгаа ч хэрэглэгчдийн сэтгэл санаа сэрүүсч буйг харуулжээ. Мягмар гарагт нийтэлсэн мэдээгээр хэрэглэгчийн итгэлийн нийлмэл индекс 10 дугаар сард өмнөх сараас 1.2 пунктээр буурч, 105.4 болсон нь нэг сарын өмнөх сэргэлтээ буцаасан үзүүлэлт юм. Одоогийн эдийн засгийн нөхцөл, ирээдүйн төлөвийн талаарх хэрэглэгчдийн төсөөллийн зургаан үзүүлэлтийг нэгтгэсэн энэ индексийн суурь түвшин 100 бөгөөд 100-аас дээш бол өөдрөг хандлагатай хүмүүс олонх байна гэсэн үг.

Хэрэглэгчид одоогийн болон ирээдүйн эдийн засгийн нөхцөлийн талаар ч илүү гутранги болжээ. Одоогийн эдийн засгийн нөхцөлийн индекс өмнөх сараас 1 пунктээр буурч 82 болсон бол эдийн засгийн төлөвийн индекс 2 пунктээр буурч 88 болсон байна.