Итэвоны гамшгийг шалгаж буй комисс Юн Сок Ёлоос мэдүүлэг авахаар төлөвлөж байна

2022 онд Сөүлийн Итэвон дүүрэгт гарсан бөөгнөрлийн гамшгийг шалгаж буй тусгай комисс засгийн газар гамшгийн үед хэрхэн ажилласан талаар Ерөнхийлөгч асан Юн Сок Ёлоос мэдүүлэг авахаар төлөвлөж байна. Энэ тухай Кореа Таймс сонин мягмар гарагт мэдээлэв. Комисс шалгалтынхаа завсрын дүнг танилцуулахдаа хоригдож буй Ерөнхийлөгч асан болон Дотоод хэргийн сайд асан И Сан Минээс 12 дугаар сард мэдүүлэг авах төлөвлөгөөгөө зарлажээ.

Гамшиг 2022 оны 10 дугаар сарын 29-нд Хэллоуины баярын үеэр Итэвоны зугаа цэнгэлийн хорооллын нарийн гудамжинд олон хүн шахцалдсанаар болж, 159 хүн амиа алдаж, 196 хүн гэмтсэн юм. Комисс гамшгийн шалтгааныг тогтоох үүрэгтэй бөгөөд засгийн газрын хариу арга хэмжээнд олон дутагдал илрүүлжээ.

Завсрын дүнгээр Дотоод хэргийн яамны нөхцөл байдлын төв гамшгийн шөнө оройн 10:48 цагт бөөгнөрлийн тухай мэдсэн ч тухайн үеийн сайд И Сан Минд 43 минутын дараа л мэдэгджээ. Тухайн үед Ерөнхийлөгч байсан Юн Сок Ёл оройн 11:21 цагт аврах ажлын үүрэг даалгавар өгсөн ч яам түүнийг 55 минутын турш хүргээгүй байна.

Комисс мөн И Сан Мин засгийн газрыг хариуцлагаас мултлуулахын тулд энэ явдалтай холбоотой гамшиг, хохирогч гэсэн нэр томъёог осол, талийгаач гэж өөрчлөхийг санал болгосон гэх мэдүүлэг авсан байна. Энэ өөрчлөлтийг Юн Сок Ёлд танилцуулсны дараа эцэслэн шийдвэрлэжээ. Хоёулаа 2024 онд Юн Сок Ёлын цэргийн байдал зарлах гэсэн бүтэлгүй оролдлоготой холбоотой эрүүгийн хэргээр шүүгдэж, цагдан хоригдож байгаа юм.

Шалгалтаар гамшгийн шөнө Сөүлийн төвийн Ёнсан дүүргийн Итэвонд 120 цагдаа байрласан ч тэдний дунд олон хүний хөдөлгөөнийг зохицуулах мэргэжилтэн нэг ч байгаагүй нь тогтоогджээ. Гамшиг болохоос өмнө цагдаад бөөгнөрөл үүсэж болзошгүй гэсэн 11 дуудлага ирсэн ч цагдаа хүн илгээгээгүй байна.

Комиссын мэдээлснээр, Ёнсан дүүргийн гал команды дарга оройн 10:29 цагт хэргийн газарт ирж, бөөгнөрлийг харсан ч 39 минутын дараа л удирдлагаа авч байгаагаа зарласан байна. Комисс мөн гамшиг болсон гудамжны ойролцоох хууль бус барилга байгууламжийг буулгаагүй хэмээн Ёнсан дүүргийн захиргааг шүүмжилжээ. Энэ байгууламж хүмүүсийн шахцалдааныг улам хүндрүүлсэн байж болзошгүй гэж үздэг.