Дараагийн тулаан нь карьерынх нь сүүлчийн тулаануудын нэг болно гэж Ислам Махачев мэдэгдэв
35 настай тамирчин Бразилийн Карлос Пратес, Эквадорын Майкл Моралес хоёрын ялагчтай тулахыг зорьж байна.
ЮФС-ийн хагас дунд жингийн аварга Ислам Махачев ойрын хугацаанд зодог тайлж болзошгүйг сануулж, дараагийн тулаан нь сүүлчийн тулаануудынх нь нэг болно гэж мэдэгджээ. Энэ тухай Зэ Нэшнл сонин мэдээлэв.
Махачев 8 дугаар сард Иэн Мачадо Гэррийг шүүгчдийн санал нэгтэй шийдвэрээр ялж, аваргын бүсээ хамгаалсан юм. Энэ нь түүний дараалсан 17 дахь ялалт болж, Андерсон Силвагийн 13 жил эвдэгдээгүй байсан ЮФС-ийн түүхэн дэх хамгийн урт ялалтын цувааны амжилтыг эвджээ.
Тэрбээр 1 дүгээр сард ЮФС 336 тэмцээнд хагас дунд жингийн түр аваргын бүсийн төлөө тулах Карлос Пратес, Майкл Моралес хоёрын ялагчтай тулахыг зорьж байна.
Пратесыг түүнд хэт аюултай, Моралесыг хэт сайн гэж ярьдаг гэдгийг Махачев олон нийтийн сүлжээнд дурджээ. «Тиймээс би тэдний шилдэг нь болох хүнтэй тулж, хэн дэлхийд хамгийн шилдэг болохыг дахин нэг удаа баталмаар байна» гэж тэрбээр бичсэн байна.
Махачев өмнө нь спортод цаг бага үлдсэнийг сануулж байсан юм. Тэрбээр ЮФС-ийн алдрын танхимын гишүүн Деметриус Жонсонд ярихдаа, одоо гурваас дөрвөн сар тутамд тулах нь өөрт нь илүү тохиромжтой гэжээ.
«Би 28 настай биш, одоо 34-тэй гэдгээ ойлгож байна» гэж тэрбээр тэр үед хэлсэн байна.
ЮФС-ийн ерөнхийлөгч Дана Уайтын хэлснээр, Ислам дунджаар жилд нэг удаа тулдаг. Махачев 1 дүгээр сард тулахаар төлөвлөгдөж байсан ч Рамадан дуусахаас өмнө тулахгүй гэсэн тул ЮФС 336-д түр аваргын тулаан зохион байгуулахаар болжээ.
