Дийп Форест хамтлагийн алдарт дуунд дуу хоолой нь орсон Соломоны эмэгтэйн гэр бүл нөхөн төлбөр эрэлхийлж байна
Афунаквад 1969 онд бичлэгийн хариуд 2 доллар өгсөн гэж охин нь ярьж байгаа бол дууны эрхийн маргаан өдгөө ч шийдэгдээгүй.
Францын Дийп Форест хамтлагийн 1990-ээд оны алдарт Свит Лулабай дуунд дуу хоолой нь орсон Соломоны арлын эмэгтэй Афунаквагийн гэр бүл хүлээн зөвшөөрөл, нөхөн төлбөр эрэлхийлж байна гэж Австралийн Эй Би Си телевиз мэдээлэв.
1987 онд нас барсан Афунаква 1969 онд Байгу нутагт Ророгвела хэмээх бүүвэйн дууг дуулж бичүүлжээ. «Дуулсны дараа түүнд 2 доллар өгсөн» гэж охин нь Элен Каси ярьсан байна.
Бичлэгийг Швейцарийн угсаатны хөгжим судлаач Хьюго Земп хийсэн бөгөөд ЮНЕСКО-гийн цуглуулгад орсныг нь хамтлаг Парисын пянзны дэлгүүрээс олсон юм. Земп нас барах хүртлээ хамтлагт зөвшөөрөл өгөөгүй гэж мэдэгдсээр иржээ.
Хамтлагийн 1992 оны цомог дэлхий даяар ойролцоогоор 3.5 сая хувь борлогдсон гэж тооцдог. Дууг Сони, Кока-Кола, Порше зэрэг брэндүүд сурталчилгаандаа ашигласан бөгөөд одоо ч 50 сая гаруй удаа сонсогджээ.
«Энэ бол өнчин хүүхдэд зориулсан дуу» гэж Байгугийн бүүвэйн дууг сахин хадгалагч 70 настай Тереза Тафили хэлжээ.
Хамтлагийн гишүүн Эрик Муке дээжийн жагсаалтаа продюсеруудад өгсөн бөгөөд зөвшөөрөл авах нь продюсер Дан Лаксманы үүрэг байсан гэж мэдэгджээ. Лаксман зөвхөн студи хариуцаж байсан, зөвшөөрлийн асуудал одоо Сони Мюзикийн эзэмшилд буй Селин Мюзикийн үүрэг байсан гэж хариулжээ. Сони хариу өгөөгүй байна.
Соломоны арлуудын Ерөнхий сайдын тусгай зөвлөх Селсус Талифилу АНУ-ын хуульчидтай ярьсан ч шүүхэд хандах зардал хэт өндөр байсан аж. Тэрбээр Сиднейн хөгжмийн продюсер Мэтт Сингмин, Афунаквагийн ач нартай хамтран алдсан орлогын зарим хэсгийг нөхөх зорилгоор Афунаква сан байгуулжээ.
