Дунд насны эмэгтэйчүүдийн тал нь архаг өвдөлттэй байдгийг тайлан харуулжээ
Шинжээчид өвдөлтийг тэвчих бус эмчид эрт хандахыг зөвлөж байна.
Эмэгтэйчүүд эрэгтэйчүүдээс архаг өвдөлтөд өртөх магадлал 70 хувь хүртэл өндөр байгааг Олон улсын цэвэршилтийн нийгэмлэгийн тайлан харуулсныг Эй Би Си телевиз мэдээлжээ.
Гурван сараас удаан үргэлжилдэг эсвэл давтагддаг өвдөлтийг архаг өвдөлт гэдэг. Тайланд дунд насны эмэгтэйчүүдийн тал орчим нь архаг өвдөлттэй байдаг ч энэ байдлыг ихэвчлэн хангалттай таньдаггүй, оношилдоггүй, зохих ёсоор эмчилдэггүй гэж дүгнэжээ.
«Дунд насны архаг өвдөлт бол маш чухал хэрнээ ихээхэн орхигдсон сэдэв» гэж нийгэмлэгийн ерөнхийлөгч, Италийн Павиагийн их сургуулийн эх барих, эмэгтэйчүүдийн эмч Росселла Наппи хэлсэн байна.
Эмэгтэйчүүдэд эдгээр шинж тэмдэг дааврын хэлбэлзэл, цэвэршилттэй холбоотой биологийн өөрчлөлт, нойргүйдэл, амьдралын хэв маягийн өөрчлөлтөөс болж дунд насандаа илэрдэг.
Тайланд булчин яс, мигрень, аарцгийн өвдөлт гэсэн гурван түгээмэл шинж тэмдгийг онцолсон бөгөөд цэвэршилтийн өмнөх үед дөрвөн эмэгтэй тутмын бараг гурав нь үе мөч, булчингийн өвдөлттэй байдаг.
Австралийн Ерөнхий эмч нарын хааны коллежийн цэвэршилтийн эрүүл мэндийн дэд бүлгийн дарга Шэрон Вэйсигийн хэлснээр, эстрогений түвшин буурах нь үе мөчний өвдөлт, хөшүүн байдал, булчин суларахад хүргэж, дааврын хэлбэлзэл мигрень үүсгэж болно.
Вэйси дунд насанд ойртож буй эмэгтэйчүүдэд хангалттай унтах, идэвхтэй хөдлөх, эрүүл хооллохыг зөвлөж, өвдөлттэй бол эхлээд өрхийн эмчид хандахыг уриалжээ.
Австралийн Архаг өвдөлтийн байгууллагын 2026 оны тайланд 6000 гаруй хүнийг хамруулсан судалгаагаар эмэгтэйчүүд дунджаар 4.6 төрлийн архаг өвдөлттэй байгааг тогтоосон байна.
