Эл Жи Энержи Солюшн гуравдугаар улиралд борлуулалтын дээд амжилт тогтоожээ

Эл Жи Энержи Солюшн компани Хойд Америкийн эрчим хүч хадгалах системийн нийлүүлэлт өссөний ачаар гуравдугаар улиралд борлуулалтын дээд амжилт тогтоож, үйл ажиллагааны ашгаа 25.7 хувиар өсгөжээ гэж Кореа Таймс сонин мэдээлэв.

Борлуулалт өмнөх оны мөн үеэс 59 хувиар өсөж 9.64 их наяд вон (7.2 тэрбум ам.доллар), үйл ажиллагааны ашиг 756 тэрбум вонд хүрчээ. Борлуулалтад Хойд Америкийн 417 тэрбум воны үйлдвэрлэлийн урамшуулал багтсан бөгөөд ашгийн түвшин 7.8 хувьтай байна.

«Гуравдугаар улирлын борлуулалт эрчим хүч хадгалах системийн нийлүүлэлт мэдэгдэхүйц өсөж, цахилгаан машины ууттай, цилиндр батерейн хэмжээ нэмэгдсэний ачаар өмнөх улирлаас 28 хувиар өссөн» гэж компанийн санхүүгийн захирал Ли Чан Сил хэлжээ.

Компани бүтэн жилийн орлогын өсөлтийн зорилтоо 20 хувь хүртэлх өмнөх таамгаас 35-40 хувь болгож нэмэгдүүлсэн байна.

Дөрөвдүгээр улиралд борлуулалт өмнөх улирлаас 10 орчим хувиар, эрчим хүч хадгалах системийн нийлүүлэлт 40 хувиар өсөх төлөвтэй байна. Гэхдээ нэг удаагийн ашиг арилж, Хондатай хамтарсан үйлдвэрийн анхны зардал нэмэгдэх тул ашигт ажиллагаа суларч болзошгүй юм.

Компани 2028 он хүртэлх нийлүүлэлтийн ихэнхийг аль хэдийн баталгаажуулжээ. Хойд Америк дахь хүчин чадлаа 2027 оны эцэс гэхэд 70 гаруй гигаватт-цаг болгох төлөвлөгөөтэй байна.

Энэ онд хөрөнгийн зардлаа 40 гаруй хувиар танаж, одоо байгаа байгууламжийнхаа ашиглалтыг сайжруулах юм.

Өр, өөрийн хөрөнгийн харьцаа өмнөх оны 125 хувиас 171 хувь, зээл, өөрийн хөрөнгийн харьцаа 76 хувиас 98 хувь болж өссөн тул компани өрөө төлөхийг нэн тэргүүнд тавих аж.