Эли Хури урлагийн сан 2028 онд Дубайд нээгдэнэ

Франц-Ливаны цуглуулагч, бизнесмэн Эли Хуригийн байгуулсан урлагийн сан 2028 оны сүүлээр Дубайн Жумейра 1 дүүрэгт байрлах вилла байшинг орчин үеийн урлагийн байгууллага болгон хувиргаж, байнгын байраа нээх гэж байна. Энэ тухай Зэ Нэшнл сонин мэдээлэв.

Төслийн зураг төслийг Йоханнесбург, Лондонд төвтэй Каунтерспейс архитектурын компанийг үүсгэн байгуулагч Сумайя Валли боловсруулжээ. Тэрбээр Лондонгийн 2021 оны Серпентайн павильоныг зохион бүтээж, 2023 онд Жидда хотод болсон Исламын урлагийн анхдугаар биенналийн уран сайхны удирдагчаар ажиллаж байсан юм.

Сан үзэсгэлэнгийн танхим, сургалтын орон зай, павильон, цэцэрлэг, олон нийтийн арга хэмжээний талбайтай болох юм. Валлигийн төсөл Бейрутын гудамжны архитектур, Персийн булангийн уламжлалт хашаат байшинд тулгуурлажээ.

“Бид санг орчин тойрноосоо тусгаарлагдсан бие даасан байгууллага бус, хот, хороолонтойгоо холбоотой байлгахыг хүссэн” гэж Хури Зэ Нэшнл сонинд хэлжээ.

Санг Кристис дуудлага худалдааны Ойрхи Дорнод дахь гүйцэтгэх захирал асан Каролин Лука удирдаж байна. Тэрбээр өмнө нь Лувр Абу Даби, Гуггенхайм Абу Даби, Заид үндэсний музей зэрэг төсөлд ажиллаж байжээ.

Сангийн анхны үзэсгэлэнгүүд Хуригийн 20 гаруй жилийн турш цуглуулсан дэлхийн олон орны уран бүтээлчдийн бүтээлээс бүрдэх юм. Хөтөлбөрт хувийн болон байгууллагын цуглуулгаас зээлсэн бүтээл, музейтэй хамтарсан үзэсгэлэн ч багтах бөгөөд АНЭУ, бүс нутгийн уран бүтээлчид олон улсын уран бүтээлчдийн хамт оролцоно.