Эмнести Интернэшнл нефтийн компаниудыг Нигер мөрний бэлчирийг цэвэрлэхэд хөрөнгө гаргахыг уриалжээ
Байгууллага бохирдлын хариуцлагыг зөвхөн нутгийн иргэдэд тохох оролдлогыг няцааж, компаниудаас хариуцлага шаардаж байна.
Эмнести Интернэшнл байгууллагын Нигер дэх салбар тус улсад үйл ажиллагаа явуулж буй нефтийн компаниудыг Нигер мөрний бэлчирийг иж бүрэн цэвэрлэх санд хангалттай хөрөнгө оруулахыг уриалжээ. Энэ тухай Премиум Таймс сонин мэдээлэв.
Байгууллагын Нигер дэх салбарын захирал Иса Сануси Мягмар гарагт Порт-Харкорт хотод нэг нефтийн компанийн 60 жилийн хайхрамжгүй үйл ажиллагааг судалсан тайлангаа танилцуулах үеэр ийн уриалжээ. Тэрбээр нефтийн компаниуд үйл ажиллагаанаасаа үүдсэн байгаль орчны хохирлыг хариуцаж, нөхөн сэргээх ажлыг дэмжих ёстой гэжээ.
“Бид Нигер мөрний бэлчирийн байгаль орчныг сэргээх цэвэрлэгээний хөтөлбөрийг яаралтай эхлүүлэхийг уриалж байна” гэж Сануси хэлжээ. Тэрбээр засгийн газрыг нефтийн компаниудын ажиллаж буй болон ашиглалтаас гарсан дэд бүтцэд иж бүрэн аудит хийж, үр дүнг нь нутгийн иргэдэд нээлттэй болгохыг уриалсан байна.
Сануси олон арван жилийн нефтийн бохирдол оршин суугчдын эрүүл мэнд, усны чанар, загас агнуур, хөдөө аж ахуйд үзүүлсэн нөлөөг судлахыг мөн шаардаж, бохирдлын хариуцлагыг зөвхөн нутгийн иргэдэд тохох оролдлогыг няцаажээ. Байгууллага Ерөнхийлөгч Бола Тинубуд захидал бичиж, тайлангийн хуулбарыг илгээн зөвлөмжийг хэрэгжүүлэхийг уриалах юм.
Энэ үеэр Огони нутгийн Яриа хэлэлцээний хороо ард иргэд олон нийтийн их хурлаар шийдвэрлэх хүртэл нефтийн хайгуулыг сэргээх тухай холбооны засгийн газартай хэлэлцээрт гарын үсэг зурахгүй гэдгээ мэдэгдсэн юм.
Премиум Таймс 8 дугаар сард иргэний нийгмийн 51 байгууллага Огони нутагт нефтийн олборлолтыг сэргээхийг эсэргүүцэж, 2025 онд Кпеан тосгонд гарсан асгаралт зэрэг шийдэгдээгүй бохирдлыг дурдсан тухай мэдээлж байжээ.
