Энэтхэг, Хятадын цэргүүд хилийн шугамын дагуу дахин сөргөлдсөнийг Энэтхэгийн албаныхан баталжээ

Энэтхэг, Хятадын цэргүүд Энэтхэгийн зүүн хойд хэсгийн Аруначал Прадеш мужид бодит хяналтын шугамын дагуу хэд хэдэн газарт дахин сөргөлдсөнийг Энэтхэгийн эрх баригчид баталсныг Дойче Велле радио мэдээлжээ.

Хятад энэ нутгийг Өмнөд Төвд гэж нэрлэдэг. Энэтхэгийн хилийн цагдаагийн ерөнхий захирал Шатружит Капур Хятадын арми цэргийн хөрөнгө оруулалт, шинэчлэлээр хамаагүй түрүүлсэн тул ердийн аргаар тэдэнтэй тэмцэхэд хэцүү байж магадгүй гэж аравдугаар сард сэтгүүлчдэд хэлсэн байна.

Хятадын Гадаад хэргийн яамны хэвлэлийн төлөөлөгч Гуо Жякүнь аравдугаар сарын 26-ны хэвлэлийн бага хурал дээр Хятад хилийн бүсэд ердийн эргүүл, хяналтын ажил явуулж, хоёр талын тохиролцоог чанд мөрдөж байгаа гэж хариулжээ.

Аруначал Прадешийн ерөнхий сайд Пема Канду хятадын цэрэг хил зөрчсөн явдал гарсныг хүлээн зөвшөөрсөн ч ийм зүйл шинэ биш, хилийн нөхцөл байдал хэвийн гэж онцолсон юм.

2020 оны зургадугаар сард Галваны хөндийд болсон ширүүн мөргөлдөөнд Энэтхэгийн 20 цэрэг амь үрэгдсэн бол Бээжин хэдэн сарын дараа дөрвөн хятад цэрэг амиа алдсаныг зарласан. Хоёр орны харилцаа тэр мөргөлдөөний сүүдрээс одоог хүртэл бүрэн гараагүй байна.

«Шалтгаан нь энгийн, хоёр талын хооронд тохиролцсон шугам байхгүй» гэж Энэтхэгийн Хятад дахь элчин сайд асан Гаутам Бамбавале Дойче Веллед тайлбарлажээ.

Жавахарлал Неругийн нэрэмжит их сургуулийн Хятад судлаач Аравинд Йелерийн хэлснээр, Бээжин Төвдөд жаран мянган мегаватт хүчин чадалтай Мэдог усан цахилгаан станц барихаа зарласнаас хойш энэ бүсэд дэд бүтэц, цэрэг, инженер техникийн ажилтан, машин механизм ихээр төвлөрүүлсэн байна.

Бээжин, Шинэ Дели хоёр шууд нислэгийн зарим чиглэлийг сэргээж, хүмүүсийн зорчих болон эдийн засгийн солилцооны хязгаарлалтыг сулруулах зэргээр харилцаагаа тогтворжуулахыг оролдож байсан үед энэ сөргөлдөөн гарчээ.