Энэтхэгийн Ил-76 тээврийн онгоц Хятадтай хиллэх өндөрлөгийн нисэх буудалд газардаж дэлхийн амжилт тогтоожээ

Энэтхэгийн Агаарын цэргийн хүчний Ил-76МД хүнд стратегийн тээврийн онгоц арваннэгдүгээр сарын 7-нд Хятадтай хиллэх зүүн Ладакхын Ньома нисэх буудалд газардаж, энэ төрлийн онгоцны дэлхийн хамгийн өндөрт газардсан амжилтыг тогтоосныг Эр Эф Ай радио мэдээлжээ.

Нисэх буудал далайн түвшнээс 4154 метр буюу 13629 футын өндөрт оршдог. Энэтхэгийн Агаарын цэргийн хүчин Оросын үйлдвэрлэлийн дөрвөн хөдөлгүүртэй энэ онгоцыг хинди хэлээр Заануудын хаан гэсэн утгатай Гажраж хэмээн нэрлэдэг.

«Энэтхэгийн Агаарын цэргийн хүчний Ил-76МД онгоц Ньомад амжилттай газардаж түүх бичлээ» гэж агаарын цэргийн хүчний мэдэгдэлд дурджээ.

Нисэх буудал орших хүйтэн цөлийн бүсэд агаарын хэм хасах 20 хэм хүртэл буурдаг.

Ньомагийн цэргийн нисэх буудлыг өнгөрсөн онд барьж дуусгасан нь Энэтхэгийн 20, Хятадын 4 цэрэг амь үрэгдсэн 2020 оны хилийн мөргөлдөөний дараа энэ мөстэй бүсэд цэргийн дэд бүтцийг эрчимтэй хөгжүүлж буйн нэг хэсэг юм.

Тэр мөргөлдөөнөөс хойш хоёр орны харилцаа аажмаар сайжирч байгаа ч газар нутгийн маргаан шийдэгдээгүй тул Төвдийн дагуу үргэлжлэх 3500 орчим километр өндөрлөг хилийн дагуу цэргээ байрлуулсаар байна.