Эстони: Украины энхийн хэлэлцээнд Европыг Кошта, Каллас нар төлөөлөх ёстой

Орос, Украины хэлэлцээнд Европын зөвлөлийн дарга Антониу Кошта, Европын холбооны гадаад бодлогын асуудал эрхэлсэн Дээд төлөөлөгч Кая Каллас нар Европыг төлөөлөхийг Эстони уриалжээ.

“Европ төлөөлөгчөө аль хэдийн сонгосон: Зөвлөлийн дарга Антониу Кошта, (Дээд төлөөлөгч) Кая Каллас нар. Хоёулаа Европын холбооны гишүүн орнуудын өмнө тодорхой хариуцлага хүлээдэг” гэж Эстонийн Ерөнхий сайд Кристен Михал хэлэв.

Италийн Ерөнхий сайд Жоржа Мелонигийн хүсэлтээр энэ асуудлыг Баасан гарагт Дублинд болох Европын зөвлөлийн албан бус дээд хэмжээний уулзалтаар хэлэлцэнэ. Мелони Коштад илгээсэн захидалдаа Европын хандлага “замбараагүй” байгаа нь дайныг уртасгах эрсдэлтэй гэжээ.

Үүний дараа Кошта Ирландад болох уулзалтаар энэ сэдвийг тэргүүн ээлжинд хэлэлцэхийг зөвшөөрсөн байна.

Кошта, Каллас нарын “бүрэн эрх Зөвлөлөөс шууд ирдэг” тул “гишүүн орнууд эхлээд тусгай төлөвлөгөө тохиролцох шаардлагагүй” гэж Михал хэлжээ.

АНУ тэргүүтэй дайныг зогсоох хүчин чармайлт эрчимжиж буй энэ үед Европыг хэн төлөөлөх асуудал улам яаралтай болоод байна. Энэ долоо хоногт Абу Дабид Орос, АНУ, Украины төлөөлөгчид гурван талт хэлэлцээ хийсэн бол Европын холбоог тусдаа, илүү өргөн хүрээтэй уулзалтад ахлах албан хаагчид төлөөлжээ.

Өнгөрсөн сард Финланд, Норвегийн удирдагчид Оросын Ерөнхийлөгч Владимир Путинтэй 90 минут утсаар ярьсан нь Европ, Кремлийн хооронд ховор холбоо болсон юм.

Гэвч энэ гурван талт утасны яриаг Данийн Ерөнхий сайд Метте Фредериксен хурцаар шүүмжилсэн нь Европын өмнөөс хэлэлцээг хэн удирдах талаар удирдагчдын санал зөрөлдөж буйг харуулжээ. Тэрбээр уг санаачилгад “эргэлзэж” байгаагаа илэрхийлж, “Ганцаараа явахын оронд Европыг нэгдмэл байлгах ёстой гэж бодож байна” гэв.

Жаред Кушнер энэ долоо хоногт “Европ өөрийгөө төлөөлөх нэг хүнийг тодорхойлж чадвал энэ нь Оросууд Европыг хэлэлцээнд оруулахаас ч илүү том амжилт болно” гэж хэлжээ. Тэрбээр АНУ-ын Ерөнхийлөгч Дональд Трампын хүргэн бөгөөд Орос, Украинтай хэлэлцээ хийж буй Америкийн гол хэлэлцээчдийн нэг юм.

Нэрээ нууцлахыг хүссэн Европын холбооны ахлах албан тушаалтны хэлснээр, Дублины уулзалтаар элч сонгох албан ёсны шийдвэр гарахгүй байх төлөвтэй. Харин Европын байр суурийг Кремльд хэн хүргэх талаар удирдагчдын дунд “ойлголцол”-д хүрч, бодит сонголтыг хожим хийх төлөвтэй гэж тэрбээр нэмжээ.

Европын холбооны хуулиар олон улсын тавцанд холбоог Европын зөвлөлийн дарга төлөөлдөг бөгөөд одоо энэ албыг Кошта хашиж байна. Мелонигийн захидалд хариулахдаа Кошта “Европын холбооны ашиг сонирхлыг гэрээнүүдийн дагуу түүний байгууллагууд төлөөлөх ёстой” гэж бичсэн нь тэрбээр энэ ажлыг хийхэд бэлэн байгаагаа сануулсан хэрэг бололтой.

Каллас ч холбооны Дээд төлөөлөгчийн хувьд гадаад бодлогын бүрэн эрхтэй. Гэвч Эстонийн Ерөнхий сайд асан Каллас Оросын талаар хэт хатуу байр суурьтай бөгөөд Москватай чин сэтгэлээсээ хэлэлцээ хийж чадахгүй гэж шүүмжлэгчид нь удаан хугацааны турш хэлсээр ирсэн.

“Шинээр хэнийг ч томилох шаардлагагүй. Оросуудад таалагдахгүй бол тэдний л асуудал. Биднийг Путинд таалагддаг хүмүүс бус, бидний итгэдэг, Европын холбооны өмнө хариуцлага хүлээдэг хүмүүс төлөөлөх ёстой” гэж Михал хэлэв.

Гэхдээ Европын холбооны байгууллагууд хэлэлцээнд тэргүүлэх үүрэг гүйцэтгэхийг хүн бүр дэмжиж байгаа юм биш. Францын ерөнхийлөгчийн сонгуулийн санал асуулгад тэргүүлж буй хэт барууны нэр дэвшигч Марин Ле Пен Брюсселийн дипломат үүргийг эрс багасгахыг хүсэж байна.

“Европын холбоонд дипломат бүрэн эрх байхгүй” гэж Ле Пенгийн Үндэсний нэгдэл (RN) намаас сонгогдсон Европын парламентын гишүүн Фабрис Леггери хэлжээ.