Филиппинчүүд АСЕАН-д залилангаас хамгийн их айдаг гэж Жи Эс Эм Эй холбооны тайланд дүгнэжээ
Хөрөнгө оруулалт, криптовалютын залилан Филиппинд бүс нутгийн дунджаас хамаагүй түгээмэл байна.
Филиппинчүүд АСЕАН-ы бүс нутагт залилангаас хамгийн их санаа зовдог бөгөөд залилангаас сэргийлэхийн тулд аюулгүй байдлын нэмэлт алхам зэрэг саадыг хамгийн их тэвчдэг хэрэглэгчид болохыг Жи Эс Эм Эй холбооны тайланд дурджээ. Энэ тухай Рапплер мэдээлэв.
Тайланг 11 дүгээр сарын 4-нд Манилад болсон дээд хэмжээний уулзалтын хажуугаар танилцуулжээ. Судалгаагаар, Филиппинд оролцогчдын 10 хувь сүүлийн 12 сард залилуулсан бол 78 хувь нь залилангийн улмаас зан төлөвөө өөрчилсөн байна.
Зан төлөвөө өөрчилсөн хувиар Филиппин 79 хувьтай Вьетнамын дараа ордог ч Вьетнамын оролцогчдын 13 хувь сүүлийн 12 сард залилуулжээ. Филиппинчүүдийн 76 хувь нь залилуулахаас айдаг аж.
Филиппинчүүдийн 49 хувь залилангийн хэргээ дижитал платформд мэдээлдэг бол ердөө 16 хувь нь цагдаад ханддаг бөгөөд бүс нутгийн дундаж 36 хувь байна. Мөн 24 хувь нь үйлчилгээ үзүүлэгчээ сольж, 62 хувь нь харилцаа, гүйлгээнээс зайлсхийдэг гэнэ.
Хөрөнгө оруулалт, криптовалютын залилан филиппин хохирогчдын 41 хувьд хүрсэн нь судалгаанд хамрагдсан зургаан зах зээлийн хамгийн өндөр, бүс нутгийн 29 хувиас хамаагүй дээгүүр үзүүлэлт юм. Тайланд хиймэл оюун одоо шинэ аюул бус, залилангийн үйл ажиллагааны орчин болсныг онцолжээ.
Филиппин Глоуб Телеком компанитай хамтран залилан, гэмт этгээдийн мэдээллийг АСЕАН-ы бусад зарим оронтой солилцох туршилтын хөтөлбөрт нэгдсэн анхны АСЕАН-ы орон болсныг холбооны төрийн бодлого хариуцсан дарга Жанетт Уайт хэлжээ.
“Залилан харилцаа холбооны суваг, дижитал платформ, төлбөрийн системээр дамждаг тул хэрэглэгчдийг хамгаалахын тулд дижитал экосистем даяар арга хэмжээ авах хэрэгтэй” гэж холбооны Ази, Номхон далайн бүсийн тэргүүн Жулиан Горман хэлжээ.
Холбоо Ази, Номхон далайн 17 орны 39 компанитай хамтран сүлжээний дохиогоор залилангийн үйл ажиллагааг эрт илрүүлэх боломжийг судалж байна. Мөн АСЕАН-ы орнууд онлайн залилантай тэмцэхэд бүс нутгийн хамтын ажиллагааг бэхжүүлэхийг эрмэлзэж байгаа юм.
