Филиппиний дуучин Кармел Колладо Азийн анхны Евровидение тэмцээнд түрүүллээ
Монгол Улс оролцсон арван нэгэн орны тэмцээн Тайландын Бангкок хотод болжээ.
Филиппиний дуучин Кармел Колладо Азийн Евровидение дууны тэмцээний анхны ялагч боллоо.
Бикол нутгийн дуучин арваннэгдүгээр сарын 14-нд, бямба гарагт Тайландын Бангкок хотод болсон тэмцээнд шүүгчдийн болон үзэгчдийн саналаар аль алинд нь тэргүүлж, нийт 211 оноо авснаар бусад 10 орны уран бүтээлчийг ардаа орхижээ.
Кармелын дуулсан Sobra-Sobra хэмээх эрч хүчтэй бүжгийн поп дууг Ника дел Росарио, Мат Олавидес нар зохиосон юм.
Филиппиний өсвөр насны дуучин шүүгчдээс 93, үзэгчдийн санал хураалтаас 118 оноо авч, нийлбэр дүнгээр ялагч болсон байна.
Aroma дуугаар оролцсон Тайландын төлөөлөгч Манг, Даоу хоёрыг Кармел ардаа орхисон. Тэд 170 оноо авч, хоёрдугаар байр эзэлжээ.
EM TIÊN дуугаар оролцсон Вьетнамын Ток Тиен 164 оноо авч, шилдэг гуравт багтжээ.
Tawag ng Tanghalan дууны тэмцээний аварга, 19 настай Кармел наймдугаар сарын 30-нд болсон улсын шалгаруулалтаар Филиппинийг төлөөлөхөөр сонгогдсон юм.
Евровидение дууны тэмцээний Азийн хувилбар анх удаа зохион байгуулагдлаа. Жил бүр болдог Евровидение тэмцээнийг Европын өргөн нэвтрүүлгийн холбоо 1956 онд анх зохион байгуулсан юм.
2025 онд Филиппин-Австри гаралтай дуучин JJ Евровидениед Wasted Love дуугаар түрүүлж байсан билээ.
Азийн Евровидениегийн анхны тэмцээнд Бангладеш, Балба, Камбож, Тайланд, Филиппин, Малайз, Вьетнам, Өмнөд Солонгос, Лаос, Бутан, Монгол гэсэн арван нэгэн орон оролцсон байна.
