Филиппиний шүүх АНУ-ын хүсэлтээр номлогч Аполло Куиболойг баривчлах захирамж гаргажээ

Макати хотын бүсийн анхан шатны шүүхийн 145 дугаар салбар АНУ-ын засгийн газрын шилжүүлэн өгөх хүсэлтийн дагуу номлогч Аполло Куиболой болон өөр хоёр хүнийг баривчлах захирамж гаргасныг Филиппиний Хууль зүйн яам Баасан гарагт мэдэгджээ.

Куиболой бол дэлхийн сүйрлийг зөгнөдөг номлогч бөгөөд Есүс Христийн хаант улс (KOJC) шашны бүлгийг үүсгэн байгуулсан юм.

Шүүх арваннэгдүгээр сарын 12-нд захирамжаа гаргажээ. Шүүхийн дүгнэлтээр, тэд тус бүр гадаадын баривчлах захирамж, яллах дүгнэлтэд нэр нь дурдагдсан этгээд мөн байна. Тэдэнд холбогдох хэрэг шилжүүлэн өгөх боломжтой гэмт хэрэгт хамаарах бөгөөд тэд уг хэргийг үйлдсэн гэж үзэх хангалттай үндэслэл бий гэж шүүх үзжээ.

Куиболойгоос гадна шилжүүлэх хүсэлтэд Тересита Толибас Дандан, Хелен Панилаг нар багтжээ.

“Үүний зэрэгцээ тус шүүх шилжүүлэх этгээд тус бүрийг Филиппинээс гарах аливаа оролдлогоос сэргийлж, тэдэнд гадагш гарахыг хориглох захирамж гаргасан” гэж Хууль зүйн яам нэмж мэдэгдлээ.

АНУ-ын хүсэлтийг өмнөх өдөр нь Макати хотын шүүхэд гаргасныг Хууль зүйн яам арваннэгдүгээр сарын 10-нд зарласан юм.

Шилжүүлэх этгээдүүдийг баривчилсан тухай шүүхэд мэдэгдмэгц тэдэнд дуудах хуудас, өргөдлийн хуулбарыг биечлэн хүргүүлэх ёстой. Тэд дуудах хуудсыг хүлээн авснаас хойш 15 хоногийн дотор баталгаажуулсан хариу тайлбар гаргах ёстой гэж яам тайлбарлажээ.

Шүүх хэргийг хянан үзээд, хэрэг үндэслэлтэй гэж үзэх анхан шатны нотолгоо байвал хүсэлтийг хангах ёстой.

Хуучин Ерөнхийлөгч Родриго Дутертегийн ойрын холбоотон Куиболой олон улсын хүний наймаа, бэлгийн мөлжлөгийн зорилгоор хүн худалдаалах, хуйвалдаан, их хэмжээний бэлэн мөнгө хууль бусаар нэвтрүүлэх хэргүүдээр буруутгагдаж байна. Тэрбээр 2024 оны арваннэгдүгээр сараас хойш Пасиг хотын шоронд хоригдож байгаа юм.

Түүнд холбогдох хэргүүд Филиппиний шүүхэд ч хянагдаж байна. Пасиг хотын шүүхэд хүний наймааны хэрэг, Кезон хотын шүүхэд насанд хүрээгүй хүнийг бэлгийн хүчирхийлэлд өртүүлсэн болон хүүхдийн эсрэг хүчирхийллийн хэрэг тус тус шүүгдэж байна.

Куиболойг хэдэн сар эрэн сурвалжилсны эцэст 2024 оны есдүгээр сарын 8-нд Филиппиний үндэсний цагдаагийн газрын дарга асан Николас Торре III-ын удирдсан ажиллагаагаар баривчилсан байна.

Куиболой, Дандан, Панилаг нар 2022 оноос хойш АНУ-ын Холбооны мөрдөх товчооны (FBI) хамгийн их эрэн сурвалжлагдаж буй хүмүүсийн жагсаалтад багтсаар байгаа. Тэдний эсрэг АНУ-д гаргасан баривчлах захирамжууд хүчинтэй хэвээр байгааг Хууль зүйн яам онцолжээ.

Шүүх хүсэлтийг хангавал Куиболой болон бусад хоёрыг АНУ руу онгоцоор хүргүүлнэ. Тэд тэнд яллагдаж буй хэргүүдээрээ шүүгдэнэ.