Филиппиний засгийн газар хүчтэй Эль-Ниньод хэрхэн бэлтгэж байна вэ

“Маш хүчтэй” Супер Эль-Ниньо эхэлсэн тул төрийн байгууллагууд болон олон нийт сэрэмжтэй байх хэрэгтэй гэж Филиппиний Агаар мандал, геофизик, одон орон судлалын алба (PAGASA) анхаарууллаа. Тус албаны мэдээллээр энэ оны арваннэгдүгээр сараас эхлэн тус улсын хэд хэдэн нутагт хур тунадас хэвийн хэмжээнээс бага орж, ган гачиг нүүрлэнэ.

PAGASA мэдэгдэл гаргахаас өмнө Ерөнхийлөгч Фердинанд Маркос Жуниор холбогдох төрийн байгууллагуудад цаг уурын энэ үзэгдлийн нөлөөнд бэлтгэх шаардлагатай арга хэмжээ авахыг үүрэг болгожээ. Тус улс Эль-Ниньотой тэмцэх арга хэмжээнд 7.7 тэрбум песо хуваарилсныг Эль-Ниньогийн ажлын хэсэг мөн мэдэгдэв.

Байгаль орчин, байгалийн баялгийн яам усны нөөцөө нэмэгдүүлэх, Эль-Ниньогийн үед гарах магадлал өндөр ой, хээрийн түймэрт бэлтгэх зорилгоор ус хуримтлуулах байгууламж, борооны ус цуглуулах систем байгуулжээ.

Нийгмийн халамж, хөгжлийн яам LAWA төслийн хүрээнд усан сан, олон зориулалттай усны дэд бүтэц, ус хуримтлуулах байгууламж зэрэг усны эх үүсвэрийг сэргээн засварлаж байна. Хөдөө аж ахуйн яам усалгааны системийг үнэлж, тариаланчдад орон нутгийн цаг агаар, усны нөхцөлд тохируулан тариалалтын хуваарийг өөрчлөхөд тусалж байна.

Үндэсний усалгааны газар нарны эрчим хүчээр ажилладаг насосуудаа сайжруулахаар ажиллаж байна. Тус газар гангийн эрсдэлтэй, ус хомс нутаг болон эмзэг байдалд буй тариаланчдад зөөврийн нарны насос байршуулж, усалгааны сувгаас лаг шавар, хог хаягдал зайлуулан усны урсгалыг сайжруулах юм.

Хөдөө аж ахуйн яам өндөр чанартай, ганд тэсвэртэй үр, бордоогоор хангаж, механикжуулалт, усалгаа, ус хэмнэх технологийн дэмжлэг үзүүлэхээр болжээ. Тус яам Вьетнамтай будаа нийлүүлэх гэрээ байгуулжээ. Гэрээний дагуу Вьетнам 2027 оны дөрөвдүгээр сар хүртэл Филиппинд 1.5 сая метр тонн DT8 будаа нийлүүлэх бөгөөд нэг метр тонны үнийг 450 ам.доллараар тогтмол барина.

Нийгмийн халамж, хөгжлийн сайд Рекс Гачалиан есдүгээр сарын 28-нд агаараас ундны ус гаргадаг анхны төхөөрөмжийг танилцуулжээ. Энэ технологи чийглэг агаараас усны уурыг ялган авч, ундны ус болгодог. Одоогоор Масбате мужийн Каваян хотын Гилотонган тосгонд усны хомсдлыг шийдвэрлэхэд ашиглаж байна.

Гачалиан аравдугаар сарын 14-нд Малаканьяны хэвлэлийн бага хурлын үеэр ямар ч хувинд суурилуулж болох зөөврийн ус шүүх иж бүрдлийг мөн танилцуулав.

Цахилгааны эрэлт огцом өсөж буй тул Эрчим хүчний яам нөөц генераторуудыг бэлэн байлгаж байна. Мөн ялангуяа аль хэдийн эмзэг байгаа Висаяс бүсийн сүлжээнд зориулж батарейн систем, хөвөгч цахилгаан станц, дизель станцыг өөр хувилбар болгон судалж байна.

Энэ онд улсын хэмжээнд нийт 2700 гаруй мегаваттын нарны, салхины, усан цахилгаан станцын төсөл ашиглалтад орно гэж тус яам тооцож байна. 2027 онд нэмж 4758 төсөл дуусах төлөвтэй.

Эрүүл мэндийн яам сургалт сурталчилгаагаа эрчимжүүлж, Эль-Ниньотой холбоотой өвчтөнүүд улсын эмнэлгүүдэд олноор ирэхэд бэлтгэж байна. Халуунд цохиулах, халуунд ядрах, астма, уушгины архаг бөглөрөлт өвчин зэрэг аагим халуунаас үүдэлтэй өвчтэй хүмүүсийг эмчлэхээр бусад тасгийн ажилтнуудыг түр томилжээ.

Тус яам эмнэлгүүдийн яаралтай тусламжийн тасагт халуунаас үүдэлтэй өвчтэй хүмүүст зориулсан тусгай шуурхай урсгал нэвтрүүлэхээр төлөвлөж байгаа ч энэ нь эцэслэн шийдэгдээгүй байна.

Боловсролын яам аравдугаар сарын 26-нд сургуулиудад энэ үзэгдэлд бэлтгэхэд туслах удирдамж гаргажээ. Удирдамж дөрвөн түвшний тогтолцоотой. Сургуулийн удирдлага өглөө, үд, үдээс хойш хэмжсэн ангийн дотоод температур, чийгшилд үндэслэн шийдвэр гаргана. Гэхдээ хичээлийг дур мэдэн зогсоохоос сэргийлж, уг шийдвэрийг боловсролын бүсийн газар эсвэл орон нутгийн засаг захиргаа хянах ёстой.

Висаяс бүсэд үүлэнд бодис цацаж хиймэл бороо оруулах ажил эхэлжээ. Энэ арга нь үүлний чийгэнд натрийн хлорид оруулж, бага, дунд зэргийн бороо орох магадлалыг нэмэгдүүлдэг.

Аравдугаар сарын 22-ны байдлаар Филиппиний Агаарын цэргийн хүчин 38 удаа хиймэл бороо оруулах ажиллагаа явуулсан байна. Мөн чихрийн нишингийн тариалангийн талбайд туслахад 30 сая песо хуваарилсан бөгөөд тэнд энэ арваннэгдүгээр сараас ажиллагаа эхэлнэ. Хөдөө аж ахуйн яам хур тунадсыг нэмэгдүүлж, газар тариаланд туслахад нэмж 270 сая песо хүссэн байна.

Нийгмийн халамж, хөгжлийн яам LAWA, BINHI төслүүдээр дамжуулан бага орлоготой өрх, тариаланчид, загасчид, гамшигт нэрвэгдсэн өрхүүдэд түр ажлын байр олгоно. Тэд эдгээр төслийн хүрээнд өөрийн суурин газартаа ажиллаж, бэлэн мөнгөний тусламж авна.

Засгийн газрын Эль-Ниньод бэлтгэх арга хэмжээнд нэмэлт санхүүжилт шаардлагатай эсэхийг тогтоохоор Төсөв, удирдлагын яам Малаканьянтай хамтран ажиллаж байгааг Ерөнхийлөгчийн ордны хэвлэлийн төлөөлөгч Клэр Кастро мэдэгдэв.