Израилийн агаарын цохилтоор Хамасын ахлах командлагч Газад амь үрэгджээ

Рафагийн бригадын командлагч Самир Абу Юнис Газын өмнөд хэсэгт орших Хан Юнисийн аль-Мавасид Израилийн агаарын цохилтод амь үрэгдсэнийг Хамас баталлаа.

Израилийн арми болон Шин Бет аюулгүй байдлын алба Хамасын цэргийн ахлах командлагчийг онилон бямба гарагт Хан Юнист нисгэгчгүй онгоцоор цохилт өгснөө өмнө нь хамтарсан мэдэгдэлдээ дурджээ.

Халдлага дүрвэгсдийн амьдарч буй майханд оногдож, өөр хоёр хүн шархаджээ. Шархадсан хүмүүсийг Хан Юнис дахь Нассер эмнэлгийн цогцолборт хүргэсэн гэж эмнэлгийн ажилтнууд бямба гарагт Al Jazeera-д мэдэгдэв.

Эмнэлгийн ойролцоо байсан Палестины сэтгүүлчид бичлэг нийтэлсэн бөгөөд Al Jazeera түүнийг баталгаажуулжээ. Бичлэгт эмнэлгийн хашаан дахь түргэн тусламжийн машинууд, цусанд будагдсан бололтой дамнуурга харагдаж байна.

Газрын дундын тэнгисийн эргийн зурвас болох аль-Мавасид майханд амьдардаг дүрвэгсэд шигүү суурьшжээ. Израиль өмнө нь аль-Мавасийг хүмүүнлэгийн бүс хэмээн тодорхойлсон ч тэнд удаа дараа халдсаар иржээ.

Газын Эрүүл мэндийн яам бямба гарагт гаргасан шинэ мэдээлэлдээ өнгөрсөн 48 цагт Израилийн халдлагад 16 хүн амь үрэгдэж, 68 хүн шархадсан гэжээ.

Газад 2025 оны аравдугаар сарын 11-нд “гал зогсоох” хэлэлцээр хүчин төгөлдөр болсноос хойш Израиль дор хаяж 1643 палестин хүний аминд хүрч, 5964 хүнийг шархдуулжээ. Нурангийн доороос дор хаяж 850 цогцос гаргасан байна.

Эрүүл мэндийн яамны мэдээллээр Израиль 2023 оны аравдугаар сард Газад дайн эхлүүлснээс хойш дор хаяж 74695 хүн амь үрэгдэж, 176093 хүн шархадсан байна.

Есөн сартай хүүхэд хөлдөж нас барсан нь энэ өвлийн анхны тохиолдол гэж тус яам мэдээлэв. Үүгээр хүйтний улмаас амиа алдагсдын тоо 11 болжээ.

Газын оршин суугчдын ихэнх нь нүүлгэн шилжүүлэгдсэн хүмүүс бөгөөд тэд сүүлийн үеийн аадар борооны улмаас ус нэвчиж гэмтсэн майхан, эвдэрсэн барилгад амьдарч байна. Аравдугаар сарын гал зогсоох хэлэлцээрийг үл харгалзан Израилийн халдлага Газ даяар хүчээ авч байна.