Фолклендийн арлын газрын тосны төслөөр Их Британи, Аргентин олон улсын шүүхэд мөргөлдөж байна

Фолклендийн арлын ойролцоо газрын тос өрөмдөхийг Их Британи зөвшөөрсөн нь дөчин жилийн өмнө дайнд хүргэсэн бүрэн эрхийн маргааныг эрс хурцатгасан гэж Аргентин Гамбург дахь Далайн эрх зүйн олон улсын шүүхэд мэдэгдсэнийг Гардиан сонин мэдээлжээ.

Аргентины Гадаад хэргийн яамны ахлах хуулийн зөвлөх Хавьер Ойарсабаль арлын 3400 оршин суугч эргэн тойрны байгалийн баялагт эрхгүй гэж мэдэгджээ.

«Эдгээр баялаг Аргентины ард түмэнд харьяалагддаг» гэж Ойарсабаль хэлсэн байна.

Израилийн Навитас, Британийн Рокхоппер компанийн удирдаж буй далайн арслан төсөл арлын нэг хүнд ногдох дотоодын нийт бүтээгдэхүүнийг гурав дахин нэмэгдүүлэх боломжтой. Аргентины Ерөнхийлөгч Хавьер Милей төслийг хууль бус гэж буруушааж, шүүхэд хандсан юм.

Аргентин өрөмдлөгийг зогсоох зэрэг яаралтай түр арга хэмжээ авахыг шаардаж, ирэх оны 3 дугаар сараас өрөмдлөг эхлүүлэхийг Их Британи зөвшөөрсөн нь колоничлогч гүрний нэг талын үйлдэл гэж мэдэгджээ.

Их Британийн Ерөнхий прокурор Элли Ривз шүүх хуралдаанд оролцож, энэ шүүх бүрэн эрхийн асуудлыг шийдэх газар биш гэж үзэж байгаагаа хэлсэн байна.

Хоёр улсын маргаан 1982 онд дайнд хүргэж, 649 аргентин цэрэг, 255 британи цэрэг, арлын гурван оршин суугч амиа алдсан юм. Энэ нь Фолклендтэй холбоотой үндсэн асуудлыг олон улсын шүүхэд хэлэлцэж буй анхны тохиолдол аж.