Францын тансаг брэндүүдийн хамгийн том зах зээл Хятадаас АНУ руу шилжиж байна

Хятадын зах зээл нэгэн цагт тансаг бүтээгдэхүүний салбарын өсөлтийн гол хөдөлгүүр байсан. Гэвч сүүлийн жилүүдэд Хятадын үл хөдлөх хөрөнгийн зах зээл удаан хугацаанд уналттай, хөрөнгийн зах зээл сул байгаа нь дотоодын эрэлтийг сулруулжээ. Одоо Хятад тансаг бүтээгдэхүүний борлуулалтыг хамгийн ихээр татаж буулгаж буй зах зээл болоод байна.

Тансаг бүтээгдэхүүний салбарын тэргүүлэгч LVMH-ийн 10 дугаар сарын 12-нд зарласан санхүүгийн тайлангаар гуравдугаар улирлын үр дүн хүлээлтээс доогуур гарчээ. Үүнд Их Хятадын бүс нутагт хэрэглээ суларсан нь голлон нөлөөлсөн бөгөөд Японоос бусад Азийн зах зээл дэх борлуулалт 5 хувиар огцом буурсан байна.

Гэхдээ Хятадын зах зээл удааширч буй энэ үед АНУ, Европ, Японы зах зээл тогтвортой байгаа нь энэ уналтыг хэсэгчлэн нөхөж байна. Францын LVMH, Hermès зэрэг тансаг брэндийн групп сүүлийн хэдэн жил АНУ-д хурдацтай тэлж, амжилт олжээ. Зарим тансаг брэндийн группийн хувьд АНУ Хятадыг орлон дангаараа хамгийн том зах зээл нь болж магадгүй гэж шинжээчид таамаглаж байна.

Financial Times сонины мэдээлснээр LVMH, Hermès, Kering, Richemont зэрэг тансаг брэндийн аварга компаниуд сүүлийн таван жилд АНУ-д тэлсээр иржээ. Тэд Нью-Йоркийн Тавдугаар өргөн чөлөө, Калифорнийн Беверли Хиллс дэх Родео Драйв зэрэг уламжлалт тансаг худалдааны төвөөс гадна Остин, Скоттсдейл, Принстон, Нэшвилл зэрэг хотод дэлгүүр нээжээ.

Эдгээр хөрөнгө оруулалт одоогоор ядаж зарим группийн хувьд үр дүнгээ өгч байна. Hermès 7 дугаар сард нийтэлсэн хагас жилийн тайландаа тогтмол ханшаар тооцоход 2026 оны эхний хагаст Америк тивийн орлого 15.3 хувиар өсөж, бүх бүс нутгаас хамгийн хурдан өссөн гэжээ. АНУ-ын зах зээл дэх гуравдугаар улирлын борлуулалт нь өссөөр байгаа гэж LVMH групп 10 дугаар сард мэдэгдсэн байна.

АНУ-ын зах зээлд бүх тансаг брэнд амжилт олоогүй. Жишээлбэл, Kering группийн харьцуулах боломжтой борлуулалт 2023 онд 22 хувиар, 2024 онд 11 хувиар буурчээ. Гэвч Их Хятадын бүс нутагт хэрэглээ суларсны цохилт илүү тод байна. Хятад нэгэн цагт Hermès-ийн дангаараа хамгийн том зах зээл байсан ч одоо тэнд нөхцөл байдал маш хүнд байна.

Харин Hermès энэ оны гуравдугаар улиралд АНУ дахь жижиглэн худалдааны сүлжээгээ үргэлжлүүлэн өргөжүүлжээ. Тус компани 7 дугаар сард Сан Диего дахь дэлгүүрээ өргөтгөн шинэчилж дахин нээсэн бол 8 дугаар сард Чикагогийн захын хороололд, 9 дугаар сард Нью-Йоркийн Бруклины Уильямсбургт шинэ дэлгүүр нээсэн.

АНУ даяар бизнесээ тэлэх нь тансаг брэндийн группүүдэд Хятадын зах зээл дэх борлуулалтын бууралтыг нөхөхөд тусалж байна. Хиймэл оюун ухааны хөгжил Уолл Стрийтийн хөрөнгийн зах зээлийн өсөлтийг хөтөлж буй энэ үед тансаг брэндийн группүүд энэ өсөлтөөс бий болж буй шинэ баялгийг өөртөө татахыг зорьж байна.

“Хөрөнгийн зах зээлээс үүдэх баялгийн нөлөө үргэлжилсээр байвал ирэх гурваас таван жилд АНУ-ын тансаг бүтээгдэхүүний зах зээл дэлхийн зах зээлээс илүү сайн үзүүлэлттэй байсаар байх төлөвтэй” гэж Deutsche Bank-ийн жижиглэн худалдаа, тансаг бүтээгдэхүүний салбарын шинжээч Адам Кокрейн Financial Times сонинд ярьжээ. Түүний үзэж буйгаар АНУ Хятадыг орлон LVMH, Richemont группийн дэлхий дээрх дангаараа хамгийн том зах зээл болох магадлалтай. Одоогоор Хятад дэлхийн тансаг бүтээгдэхүүний нийт хэрэглээний 30 хувийг эзэлдэг.

АНУ-ын Ерөнхийлөгч Трампын эхлүүлсэн тарифын дайн ч Францын зарим тансаг брэндийг АНУ-д үйлдвэр байгуулахад хүргэжээ. Louis Vuitton Трампын анхны бүрэн эрхийн хугацаанд буюу 2019 оноос Техас мужийн Алварадо хотод арьсан бүтээгдэхүүн үйлдвэрлэж эхэлсэн бөгөөд 2027 он гэхэд хоёр дахь цехээ нээнэ гэж мэдэгдсэн байна.