Газын мөчөө алдсан хүүхдүүдийг гадаадад эмчлүүлэхийг Израиль хязгаарлаж байна гэж хүний эрхийн байгууллага мэдэгдэв
Газад хиймэл эрхтэн хийх мэргэшсэн ердөө найман мэргэжилтэн байгаа аж.
Газын зурвасын мөчөө тайруулсан хүүхдүүдийг гадаадад эмчлүүлэхийг Израиль хязгаарлаж байна гэж Женевт төвтэй Евро-Газар дундын тэнгисийн хүний эрхийн хяналтын байгууллага мэдэгдсэнийг Аль Жазира телевиз мэдээлжээ.
Байгууллагын мэдээгээр Израилийн довтолгооны улмаас Газын 1134 хүүхэд мөчөө тайруулсан ч цөөхөн нь урт хугацааны эмчилгээ авч байна.
Дэлхийн эрүүл мэндийн байгууллага 2024 оны 9 дүгээр сараас 2026 оны 5 дугаар сарын хооронд хүүхэд, насанд хүрэгчдийг оролцуулан 2300 мөчгүй хүнийг үнэлгээнд хамруулсны ердөө 500 нь байнгын хиймэл эрхтэн авсан байна.
«Эмчилгээ, нөхөн сэргээлт, зохих боловсролоос татгалзсаар байх нь эдгээр хүүхдийн одоо амсаж буй хохирлыг насан туршийн гачигдал болгох эрсдэлтэй» гэж байгууллага анхааруулжээ.
36 настай Фидаа Ахмад Аль-Шаерийн хэлснээр Израилийн их бууны сум ойролцоо унаснаар 11 настай хүү нь саажилттай болж, нэг гараа алдсан ч хил хаалттай тул гадаадад мэс засал хийлгэж чадахгүй байна.
Байгууллага Израилийг дайны гэмт хэрэгт буруутгаж, мэргэшсэн багууд Газад ажиллахад нэвтрэх зөвшөөрөл шаардлагатай байгааг онцолсон.
Газад хиймэл эрхтэн хийх, суулгах, засах тоног төхөөрөмж хангалтгүй бөгөөд Израилийн хязгаарлалтаас болж шаардлагатай тоног төхөөрөмжийг оруулж чадахгүй байгаа юм.
