«Генералиссимус Суворов» шумбагч онгоц «Булава» пуужин харвав

ОХУ-ын Номхон далайн флотын стратегийн зориулалттай «Генералиссимус Суворов» атомын шумбагч онгоц Охотын тэнгисээс «Булава» тив алгасагч баллистик пуужинг усан доороос харваж, Архангельск мужийн Чижа полигоныг онилжээ. Энэ тухай ОХУ-ын Батлан хамгаалах яамнаас ТАСС агентлагт мэдээлснийг Ведомости сонин дамжуулав.

Цэргийн яамны мэдээлснээр, харвалтыг багийн байлдааны төлөвлөгөөт бэлтгэлийн хүрээнд хийсэн бөгөөд пуужинг усан доороос хөөргөж, ОХУ-ын нутаг дэвсгэр дээрх полигоныг бай болгон сонгосон байна.

«Генералиссимус Суворов» нь Санкт-Петербург дахь Рубин тэнгисийн техникийн төв зураг төслийн товчооны боловсруулсан «Борей-А» төслийн хоёр дахь цуврал атомын пуужин тээгч шумбагч онгоц юм. Энэ төслийн шумбагч онгоцыг бүтээхдээ систем, тоног төхөөрөмжийг боловсронгуй болгож, ашиглалтын аюулгүй байдлыг нэмэгдүүлсэн аж.

Шумбагч онгоцыг 2014 оны 12 дугаар сарын 26-нд Севмаш үйлдвэрт суурилуулж эхэлсэн бөгөөд 2022 онд ОХУ-ын Тэнгисийн цэргийн флотын бүрэлдэхүүнд орж, 2023 оны 10 дугаар сард Хойд флотоос Номхон далайн флот руу шилжиж, Камчатка дахь байнгын байршилдаа хүрсэн юм. 7 дугаар сарын сүүлээр «Ясень-М» төслийн олон зориулалттай «Ульяновск» атомын шумбагч онгоцыг Севмаш үйлдвэрийн дарвуулаас гаргасан бөгөөд ёслолын арга хэмжээг ОХУ-ын Тэнгисийн цэргийн флотын ерөнхий командлагч адмирал Александр Моисеев удирдсан байна.