Гүүглийн Оросын охин компани толгой компанийнхаа 16.8 тэрбум рублийн торгуулийг төлжээ

Гүүгл компанийн Оросын охин компани Америкийн толгой компанид Орост ногдуулсан 16.8 тэрбум рублийн торгуулийг төлжээ. Энэ тухай РИА Новости агентлаг компанийн дампуурлын асуудал хариуцсан менежер Валерий Таляровскийн шүүх хуралдаан дээр хэлсэн үгийг иш татан мэдээлэв.

«Энэ оны есдүгээр сарын 20-ны байдлаар компанийн дансанд 16.7 тэрбум гаруй рубль орсноос ойролцоогоор 14.7 тэрбум рублийг Шүүхийн шийдвэр гүйцэтгэх алба Гүүглээс захиргааны торгууль гаргуулах гүйцэтгэх хуудсын дагуу суутгасан» гэж Таляровский хэлжээ.

Менежерийн хэлснээр шийдвэр гүйцэтгэх албаны дансанд охин компанийн өмнөөс орсон 2.1 тэрбум гаруй рубль мөн торгуулийг төлөхөд зарцуулагдсан байна. Нийтдээ дампуурлын хөрөнгөнд 18.8 тэрбум гаруй рубль орсон бөгөөд үлдсэн мөнгөөр татварын албаны өр, хуучин ажилтнуудын 400 сая гаруй рублийн цалинг төлжээ.

Гүүгл хориотой агуулга устгаагүй, гадаадын интернэт компаниудын Орост салбартай байх тухай хуулийг мөрдөөгүй зэргээр Оросын хуулийг зөрчсөн хэргээр олон удаа захиргааны хариуцлага хүлээсэн. 2021 оны эцэст шүүх Гүүглийг 7.2 тэрбум рублиэр, дараа нь Оросын армийн үйл ажиллагааны тухай худал мэдээлэл устгаагүй хэргээр 21.7 тэрбум рублиэр торгожээ.

Москвагийн Арбитрын шүүх 2023 оны аравдугаар сард Гүүглийн Оросын охин компанийг дампуурсанд тооцсон юм. Шүүх аравдугаар сарын 28-нд дампуурлын ажиллагааг ирэх оны дөрөвдүгээр сар хүртэл сунгажээ.