Интелийн хувьцаа 45 хувь унасны дараа чип үйлдвэрлэх хөтөлбөр нь хүнд сорилттой тулгарчээ

АНУ-ын Интел компани 1970-аад оноос хойших хамгийн огцом хувьцааны уналтын дараа бусдад чип үйлдвэрлэж өгөх бизнесээ хөл дээр нь босгох шахалтад орсон гэж Си Эн Би Си мэдээлжээ.

Компани сүүлийн таван жилд 108 тэрбум долларын хөрөнгө оруулалтынхаа ихээхэн хэсгийг зарцуулж, Тайванийн Ти Эс Эм Си-тэй өрсөлдөхийг оролдсон ч хамгийн дэвшилтэт чипэндээ нэр хүндтэй захиалагч олоогүй байна.

Пүрэв гаригт Интел энэ улирлын орлого шинжээчдийн таамгаас 1 тэрбумаас 2 тэрбум доллараар бага гарна гэж мэдэгджээ. Санах ой, бусад эд ангийн үнэ өссөнөөс компьютерын зах зээл хүндэрсэн байна. Хувьцаа баасан гаригт 29 хувь унаж, аравдугаар сарын уналт 45 хувьд хүрч, даваа гаригт дахин 8 хувь буурчээ.

Дата төвийн бизнес нь гуравдугаар улиралд 78 хувь өсөж 7.3 тэрбум долларт хүрсэн ч компани эрэлтийг хангаж чадахгүй байгаа юм.

Иймээс Интел Орегон дахь үйлдвэрийнхээ хүчин чадлын нэг хэсгийг шинэ үеийн чипээс хуучин технологид шилжүүлж байна. Гаднын захиалагч татахад яг энэ шинэ чипэд найдаж байсан тул алхам нь уг зорилгод саад болж магадгүй аж.

«Интелд өөрийн эрэлтээс давсан хүчин чадал байхгүй бол тэд найдвартай нийлүүлэгч биш гэж захиалагчид болгоомжилж байна» гэж Интелийн захирлуудын зөвлөлд бараг гучин жил ажилласан Харвардын профессор Дэвид Йоффи хэлжээ. Гүйцэтгэх захирал Лип-Бу Тан ирэх хоёр улиралд цөөн хэдэн захиалагчаа зарлана гэж мэдэгдсэн байна.

Бродком, Куалком зэрэг компани өөрийн өрсөлдөгчид чипээ үйлдвэрлүүлэхээс татгалзаж магадгүй гэж Йоффи үзэж байна. «Хамгийн зөв шийдэл бол үйлдвэрийн бизнесээ салгах явдал» гэж тэрбээр нэмжээ.

Америкт өөрийн чип үйлдвэрлэгч байхгүй бол геополитикийн асуудал гарахад тус улсын салбарт хүнд тусна гэж Йоффи анхааруулжээ. Түүний тооцоогоор Ти Эс Эм Си АНУ-д дэлхийн хүчин чадлынхаа 20-25 хувийг л бий болгож чадах бөгөөд үүнд хэдэн жил шаардагдана.