Иракийн парламентын гишүүн асан Ахмед аль-Алвани Бейрутэд нас барсан байдалтай олджээ
Аль-Алванийн алба хэргийг улс төрийн аллага гэж нэрлэжээ.
Иракийн парламентын гишүүн асан Ахмед аль-Алванийн цогцсыг Ливаны нийслэл Бейрутын нэгэн орон сууцнаас олж, эрх баригчид аллагын хэргээр мөрдөн шалгаж эхэлжээ. Энэ тухай Аль Жазира телевиз мэдээлэв.
Ливаны албан ёсны мэдээллийн агентлагийн мэдээлснээр түүний цогцсыг Даваа гарагт Бейрутын Тарик аль-Жадида хороололд олсон бөгөөд мөрдөн шалгалтыг шүүгч Ахмед Рами аль-Хажж хянан удирдах аж.
«Энэ бол эмгэнэл, буруушаалтаар өнгөрөөх энгийн хэрэг биш» гэж аль-Алванийн алба мэдэгдэлдээ дурдсан байна.
Иракийн Ливанд суугаа Элчин сайд Мохаммед Реда аль-Хусейни элчин сайдын яам хэргийг анхааралтай ажиглаж, Ливаны аюулгүй байдлын байгууллагуудын эцсийн дүгнэлтийг хүлээж байгааг мэдэгджээ.
Суннит улстөрч аль-Алвани Иракийн парламентад баруун Анбар мужийг төлөөлж байсан бөгөөд 2012-2013 онд тухайн үеийн Ерөнхий сайд Нури аль-Малики тэргүүтэй шиа засгийн газрын эсрэг жагсаалын үеэр нэр хүнд нь өссөн юм.
Тэрээр 2013 оны 12 дугаар сард Рамади дахь гэрт нь хийсэн нэгжлэгийн үеэр баривчлагдаж, ах дүү нь амь үрэгджээ. 2014 онд терроризмын хэргээр цаазаар авах ял сонссон ч арав гаруй жил хоригдсоны дараа 2025 оны 4 дүгээр сард өршөөлийн хуулиар суллагдсан байна.
