Сиднейн эмнэлэгт хоёр сувилагч халдлагад өртсөний дараа 129 харуул нэмж авахаар болжээ
Эмнэлгийн харуулууд ердийн иргэнээс илүү эрх мэдэлгүй тул тэдэнд нэмэлт эрх олгох эсэхийг Шинэ Өмнөд Уэльсийн засгийн газар судалж байна.
Австралийн Шинэ Өмнөд Уэльс мужийн засгийн газар 27 эмнэлэгт бүтэн цагийн 129 харуул нэмж ажиллуулахаар болсноо Лхагва гарагт зарлажээ. Энэ тухай Эй Би Си мэдээлэв.
Шийдвэр Сиднейн Конкорд эмнэлэгт хоёр сувилагч эмэгтэй өвчтөний халдлагад өртсөн гэх хэргийн маргааш гарсан юм. Цагдаагийн мэдээлснээр, 44 настай өвчтөн 34, 57 настай хоёр эмэгтэйд Мягмар гарагт халдсан гэх бөгөөд түүнийг барьж, тайвшруулах эм тарьсан байна. Цагдаа нарт гурван цагийн дараа мэдэгджээ.
Хоёр сувилагч хоёулаа эмчилгээ хийлгэж, нэг нь бугуйгаа хугалсан гэж Эрүүл мэндийн сайд Райан Парк хэлжээ. Өвчтөн эмнэлэгт хэвээр байгаа бөгөөд хэргийг цагдаа шалгаж байна.
“Хүндрэл учруулдаг өвчтөн, зочид болон манай эмнэлэгт ирж буй хүмүүстэй харьцахад нэмэлт ажилтан дэмжлэг үзүүлж байгааг мэдэрвэл тэдэнд хамаагүй хялбар болно” гэж Парк онцолсон байна. Эрүүл мэндийн үйлчилгээний ажилтны үйлдвэрчний эвлэлийн нарийн бичгийн дарга Жерард Хейс нэмэлт ажилтнууд хүчирхийллийг гарахаас нь өмнө урьдчилан сэргийлэхэд туслана гэж үзжээ.
Сиднейн Ройял Норт Шор эмнэлгийн харуул Брюс Роулинг ажил дээрээ олон удаа гэмтсэн гэнэ. Хамгийн хүнд нь өөр эмнэлэгт шилжүүлэх гэж буй эрэгтэй өвчтөнийг барьж байхад эрхий хуруу нь мултарч, шөрмөс нь тасарсан явдал байжээ.
Роулинг 650 орчим ортой томоохон эмнэлэгт нэг дор ихэвчлэн дөрвөн харуул ажилладаг гэж ярьжээ. Ерөнхий жишгээр 100 хүнд нэг харуул ногдох ёстой ч зочид, ажилтнуудыг тооцвол үүнд хүрэх боломжгүй аж. Харуулууд сургалтад хамрагддаг ч ердийн иргэнээс илүү эрх мэдэлгүй гэдгийг тэрбээр онцолсон байна.
Вестмид, Принс оф Уэльс, Ройял Норт Шор зэрэг яаралтай тусламжийн тасаг нь ачаалал ихтэй эмнэлгүүдэд хүчирхийлэл хамгийн их гардаг. Парк үүнийг хар тамхины хэрэглээ өөрчлөгдсөнтэй холбон тайлбарлаж, 20 жилийн өмнөх героиноос ялгаатай нь метамфетамин хэрэглэсэн хүмүүс ажилтнуудад аюултай нөхцөл үүсгэдэг гэжээ.
Харуулуудад нэмэлт эрх олгох нь өөр сорилт дагуулна гэж Парк хэлсэн бөгөөд засгийн газар энэ асуудлаар одоогоор шийдвэр гаргаагүй байна.
