Ираны дайны улмаас газрын тосны ашгийн хэмжээ өсч, Шелл компанийн ашиг хоёр дахин нэмэгдэж 10.8 тэрбум ам.долларт хүрчээ

Ойрхи Дорнодын мөргөлдөөний улмаас газрын тос, байгалийн хийн үнэ өсч, дэлхийн зах зээлд хомсдол үүссэний дараа Шелл компани сүүлийн улиралд ашгаа хоёр дахин нэмэгдүүлжээ. Энэ тухай Гардиан сонин мэдээлэв.

Шелл компани долдугаар сараас есдүгээр сарын улиралд 10.8 тэрбум ам.долларын тохируулсан ашиг олсон нь 2025 оны гуравдугаар улирлын 5.432 тэрбум ам.доллараас хоёр дахин их юм. Энэ үр дүн шинжээчдийн таамагласан 10.33 тэрбум ам.доллараас давжээ.

Компани ирэх гурван сард хувьцаа эзэмшигчдэд 5 тэрбум ам.доллар буцаан олгохоор хувьцаагаа эргүүлэн худалдан авах хөтөлбөрөө өмнөх улирлын 3 тэрбум ам.доллараас нэмэгдүүлжээ.

«Дэлхийн эрчим хүчний системд ноцтой тасалдал үргэлжилсэн улиралд Шелл үйл ажиллагааны гүйцэтгэлдээ тууштай анхаарсны ачаар маш хүчтэй үр дүн гаргалаа» гэж компанийн гүйцэтгэх захирал Ваэль Саван хэлжээ.

Ашгийн өсөлтийн дараа пүрэв гарагийн өглөөний арилжаагаар Шеллийн хувьцаа 3 хувиар өссөнийг уур амьсгалын идэвхтнүүд шүүмжилсэн байна. «Чулуужсан түлшнээс үүдэлтэй шуурга, үер, өсөн нэмэгдэж буй зардал олон нийтийг сүйтгэж байхад газрын тосны удирдлагууд живж буй гаригийн тавцан дээр шампанск задалж байна» гэж Гринпийс байгууллагын ахлах идэвхтэн Филип Эванс хэлжээ.

Ойрхи Дорнод, Орос дахь газрын тос боловсруулах үйлдвэрүүд ноцтой эвдэрснээс дэлхийн зах зээлд хомсдол үүсэж, Шеллийн боловсруулах үйлдвэрүүдийн ашгийн хэмжээ гуравдугаар улиралд баррель тутамд 42 ам.доллар болж, хоёрдугаар улирлын 24 ам.доллараас эрс өссөн байна. Энэ нь Орос-Украины дайны эхэн үед тогтоосон баррель тутамд 28 орчим ам.долларын дээд амжилтаас ч давжээ.

Ойрхи Дорнодын хямрал Шеллийн байгалийн хийн олборлолтод хүчтэй нөлөөлж, Персийн булан дахь хий боловсруулах гол байгууламжуудын нэг нь ноцтой эвдэрчээ. Дайны өмнө өдөрт 900 мянган баррель газрын тостой тэнцэх байсан компанийн хийн олборлолт гуравны нэгээр буурсан юм.