Ираны сүүлчийн шахын хүү Реза Пахлави Франкфуртад Эрх чөлөөний шагнал хүртжээ

Ираны сөрөг хүчний удирдагч Реза Пахлави бямба гарагт Германы Гессен мужийн Франкфурт хотод Эрх чөлөөний шагнал хүртсэнийг Дойче Велле радио мэдээлжээ.

Цагдаагийн мэдээлснээр, Пахлавийг дэмжиж 18 мянга орчим хүн цугларчээ. Арга хэмжээ 1848-1849 онд Германы анхны сонгогдсон парламент хуралдаж байсан Гэгээн Паулын сүмд болсон байна.

Пахлави бол 1979 оны хувьсгалаар түлхэн унагаагдаж цөллөгт гарсан Ираны сүүлчийн шах Мохаммед Реза Пахлавийн хүү юм. Шагналыг Чөлөөт ардчилсан намтай холбоотой Фридрих Науманы сан гардуулжээ.

«Энэ бол ардчилал заалгахыг хүлээж буй бус, харин ардчиллаа хэрэгжүүлэхээс сэргийлэгдэж буй орон» гэж Пахлави хэлсэн байна.

Тэрбээр шагналыг Иранд ардчилсан засгийн газар гарах хүртэл зөвхөн итгэмжлэгдсэн этгээдийн хувиар түр авч байгаагаа онцолжээ. Хүний эрхийн байгууллагуудын мэдээлснээр, нэгдүгээр сард эсэргүүцлийн жагсаалыг дарахад олон мянган хүн амь үрэгдсэн.

Пахлавийг Израилийг ил дэмждэг, эцгийнхээ дарангуйллаас хол байж чадаагүй гэж зарим хүн шүүмжилдэг.

Франкфуртын Социал демократ нам болон Ногоонтны салбарууд арга хэмжээг бойкотлосон бол АФП агентлагийн иш татсанаар, Иранд хоригдож буй 200 орчим хүн шагнал олгохыг эсэргүүцсэн захидалд гарын үсэг зурж, түүнийг өнгөрсөн дарангуйллын бэлэг тэмдэг гэж нэрлэжээ.