Италид мянга мянган хүн амьжиргааны өртөг, батлан хамгаалах зардлын өсөлтийг эсэргүүцэн ажил хаяв
Ерөнхий ажил хаялтад оюутнууд, тариаланчид, гал сөнөөгчид болон ажилчид нэгдэн засгийн газрын эдийн засгийн тэргүүлэх чиглэлийг шүүмжилжээ.
Италийн нийслэл Ромд мянга мянган хүн амьжиргааны өртөг өсч, батлан хамгаалах зардал нэмэгдэж буйг эсэргүүцэн ерөнхий ажил хаялтын хүрээнд жагсчээ. Энэ тухай Африканьюс мэдээлэв.
Жагсагчид Термини вокзалын ойролцоо цугларч, Пьяцца дей Чинквеченто талбайгаас ажилчдын хөдөлмөрөөр ашиг олж, ирээдүйг нь эрсдэлд оруулж буй хүмүүсийг буруушаасан том туг барин хөдөлжээ.
Жагсаалд гал сөнөөгчид, тариаланчид, оюутнууд болон бусад иргэд тракторууд, такситай хамт нэгдэж, засгийн газрын эдийн засаг, зардлын тэргүүлэх чиглэлд дургүйцлээ илэрхийлэв.
Оюутнууд сургуульд илүү их хөрөнгө оруулж, орон сууцны дэмжлэг нэмэгдүүлэхийг шаардан хэдэн долоо хоног жагсаж байгаа бол тариаланчид, ачааны машины жолооч нар түлшний үнэ, амьжиргааны өртөг өссөнийг эсэргүүцэж байна.
Батлан хамгаалах зардлын өсөлт ч жагсагчдын эсэргүүцлийн гол сэдвүүдийн нэг болж, тэд төсвийн хөрөнгийг нийгмийн хэрэгцээнд зарцуулахыг шаардаж байна. Үйлдвэрчний эвлэлийн удирдсан энэ жагсаал эдгээр шаардлагыг Ромын гудамжинд нэгтгэжээ.
