Израилийн арабын намууд Нетаньяхуг огцруулахын тулд Гади Айзенкотыг дэмжих төлөвтэй байна
Айзенкотын хүрээ арабын намуудтай эвсвэл 120 суудалтай Кнессетэд 67 суудлын олонхтой болох боломжтой юм.
Израилийн пүрэв гарагийн сонгуулиар өрсөлдөгч хоёр гол хүрээний аль нь ч тодорхой олонх бүрдүүлээгүй гэж Хиндустан Таймс сонин мэдээлжээ. Нийт 19 суудал авсан арабын хоёр гол нам болох Раам, Хамтарсан жагсаалт Ерөнхий сайд Биньямин Нетаньяхуг засгийн эрхээс зайлуулахын тулд Гади Айзенкотын тэргүүлсэн сөрөг хүчний хүрээг дэмжиж магадгүй байна.
Таймс оф Израиль сонины мэдээлснээр Хамтарсан жагсаалт засгийн газарт орохыг хүсэхгүй ч Нетаньяхугийн эсрэг намуудыг гаднаас нь дэмжихэд бэлэн байна. «Энэ аймшигт засгийн газрыг унагахыг хүссэн хэнд ч бид туслахыг хүсэж байна» гэж Кнессетийн туршлагатай гишүүн Ахмад Тиби хэлсэн байна.
Арабын улс төрийн хөдөлгөөний нэрт зүтгэлтэн Жафар Фарах Их Британийн Телеграф сонинд ярихдаа хоёр нам Израилийн Ерөнхийлөгч Ицхак Херцогт Айзенкотыг дэмжих хүсэлтэй гэдгээ мэдэгдэж, Израилийн армийн Жанжин штабын дарга асан түүнийг дараагийн Ерөнхий сайдад санал болгох төлөвтэй гэжээ.
Тиби мөн Айзенкотыг 1993 онд Ослогийн хэлэлцээрийн хүрээнд Палестиныг чөлөөлөх байгууллагатай хэлэлцээ хийсэн талийгаач Ерөнхий сайд Ицхак Рабин шиг байхыг уриалсан. Тухайн үед арабын хоёр нам Рабины засгийн газрыг дэмжиж байжээ.
Энэ бол 2023 онд Хамас-ын халдлагаас хойш Израилд болсон анхны сонгууль юм. Нетаньяхуг эсэргүүцэгч еврей олонхтой намууд 48, Нетаньяхугийн хүрээ өмнөх 68 суудлаасаа цөөн буюу 53 суудал авсан бөгөөд аль ч тал 61 суудлын олонхын босгыг давж чадаагүй байна.
