Израилийн арми Хан-Юнис дахь Нассер эмнэлэг рүү цохилт өгч, 6 хүн амь үрэгджээ

Израилийн арми Палестины өмнөд хэсгийн Хан-Юнис хотод байрлах Нассер эмнэлэг рүү цохилт өгч, 6 хүн амь үрэгдэж, дор хаяж 20 хүн шархадсан тухай Газын зурвасын аврах алба пүрэв гарагт мэдэгдлээ.

Цохилт лхагва гарагаас пүрэв гарагт шилжих шөнө болжээ. Нассер эмнэлэг бол Газын зурвасын хамгийн чухал эрүүл мэндийн байгууллагуудын нэг юм. Дайн эхэлснээс хойш уг эмнэлгийн цогцолбор Израилийн цохилтод олон удаа өртөөд байна.

Цохилтоос 7 цагийн дараа буюу пүрэв гарагийн өглөө Израилийн армийн хэвлэлийн төлөөлөгч болон Израилийн Дотоодын аюулгүй байдлын алба (Шин Бет) цохилтын бай хэн байсныг эцэст нь зарлав. Франц олон улсын радиогийн Иерусалим дахь сурвалжлагч Мишель Полийн мэдээлснээр, бай нь ХАМАС-ын Хан-Юнисын бригадын командлагч Мухаммед Абу Исмаил байжээ.

Израилийн тагнуулын мэдээллээр Абу Исмаил уг эмнэлгийн цогцолборыг командын төв болгон ашиглаж, олон арван халдлагыг зохион байгуулж удирдсан байна. Дайны үеэр тэрбээр Израилийн хэд хэдэн барьцаалагдагчийг хорих ажлыг хариуцаж байсан гэнэ.

Энэ бол 10 дугаар сарын 27-нд Израилийн парламентын сонгууль болсноос хойш хамгийн олон хүн амь үрэгдсэн цохилт юм.

ХАМАС мөн АНУ-ын Ерөнхийлөгч Трампын байгуулсан Энх тайвны зөвлөлийг буруутгав. Тус зөвлөл Газын гал зогсоох хэлэлцээрийн хэрэгжилтийг хянадаг ч энэ цохилтыг зогсоож чадаагүй байна.

Цохилтын дараа Энх тайвны зөвлөл пүрэв гарагт Трампын дэвшүүлсэн Газын энхийн төлөвлөгөөг яаралтай хэрэгжүүлэхийг уриалжээ.

“Израиль Хан-Юнис дахь Нассер эмнэлэг рүү цохилт өгснөөр харамсалтай нь хүмүүс амь үрэгдлээ. Энэхүү эмгэнэлт явдал Ерөнхийлөгч Трампын дэвшүүлсэн энхийн иж бүрэн төлөвлөгөөг цаашид хойшлуулалгүй нэн даруй хэрэгжүүлэх ёстойг харуулж байна” гэж зөвлөл X сүлжээнд нийтэлсэн мэдэгдэлдээ дурдсан байна.