Израилийн сонгуульд Нетаньяхугийн блок тэргүүлсэн ч олонхи бүрдүүлж чадсангүй

Израилийн парламентын сонгуулийн эцсийн дүнгээр Ерөнхий сайд Биньямин Нетаньяхугийн блок 53 суудал авч тэргүүлсэн ч олонхи бүрдүүлж чадсангүй. Энэ тухай Евроньюс мэдээлэв.

Нетаньяхугийн өрсөлдөгч Гади Айзенкотын төвийн үзэлтэй Яшар намаар удирдуулсан сөрөг хүчний бүлэг 48 суудал авчээ. Нетаньяхугийн барууны Ликуд нам 27 суудалтайгаар хамгийн том нам хэвээр үлдсэн бол араб намууд нийлээд 19 суудал авч дээд амжилт тогтоосон байна.

Нетаньяхү араб намуудыг сонгуулийг хулгайлсан гэж буруутгаж, цагдаа болон дотоодын аюулгүй байдлын Шин Бет албыг сонгуулийн луйврыг нягт шалгахыг уриалжээ.

Ликуд нам мөн гадаадын санхүүжилтээр сонгогчдод нөлөөлсөн гэж мэдэгдэж, Раам нам Катараас мөнгө авсан гэх хардлагыг онцолсон. “Раамгейтийн дуулиан бол газар хөдлөлт. Израилийн сонгуулийг хулгайлсан” гэж Ликуд пүрэв гарагт мэдэгдэв.

Мэдээллээр, Раам намын дарга Мансур Аббас ямар нэг буруу зүйл хийснээ үгүйсгэж, мөрдөн шалгалтыг талархан хүлээж авна гэжээ. Айзенкот гадаадын хөндлөнгийн оролцоо хүлээн зөвшөөрөшгүй, туйлын ноцтой хэрэг гэж үзэж, Шин Бетийг хардлагыг нэн даруй, бүрэн шалгахыг уриалсан байна.

Израилийн Ерөнхийлөгч Ицхак Херцог одоо Кнессетэд сонгогдсон намуудын удирдагчидтай зөвлөлдөж, хангалттай дэмжлэг авах магадлал хамгийн өндөр нэр дэвшигчид засгийн газар бүрдүүлэх үүрэг өгөх юм.

Хуулиар тэр хүнд 28 хоногийн хугацаа олгох бөгөөд Ерөнхийлөгч шаардлагатай бол дээд тал нь 14 хоногоор сунгаж болох юм. Бүтэлгүйтвэл хоёр дахь удирдагчид 28 хоног хүртэлх хугацаа олгож, тэр нь ч бүтэлгүйтвэл Кнессет гурав дахь нэр дэвшигчид 14 хоног өгөхийг хүсэх эрхтэй.

Бүх оролдлого бүтэлгүйтвэл дахин сонгууль зарлах ёстой.