Канад, Европын холбоо Ирээдүйн төлөөх эвсэл байгуулж, бусад орныг нэгдэхийг урив

Канад, Европын холбоо Ирээдүйн төлөөх эвсэл хэмээх шинэ түншлэлээ зарлаж, ижил үзэл бодолтой бусад орныг нэгдэхийг урьжээ. Энэ тухай Гардиан сонин мэдээлэв.

Канадын Ерөнхий сайд Марк Карни, Европын комиссын дарга Урсула фон дер Ляйен нар баасан гарагт Монреальд сэтгүүлчдэд хэлэхдээ, Канад болон 27 гишүүнтэй холбооны хамгийн гүнзгий түншлэл урьд өмнө байгаагүй тогтвортой байдал, боломжийг бий болгоно гэжээ.

“Бидний нийгмийг шинэ шуурга доргиосон” гэж Карни хэлэхдээ уур амьсгалын хямрал, ардчиллын хэм хэмжээ доройтох, худалдааг зэвсэг болгох явдлыг дурджээ.

Хоёр өдрийн дээд хэмжээний уулзалтын төгсгөлд удирдагчид цаашдын хэлэлцээгээр илүү нэгдсэн зах зээл бий болгож, худалдаа, зорчих хязгаарлалтыг багасгаж, боловсролын шинэ боломж нээнэ гэв.

АНУ-тай худалдааны дайн өрнөж буй Канад шинэ түнш хайж, ялангуяа батлан хамгаалахад Америкийн компаниудаас хэт хамааралтай байхаас болгоомжилж байна. Илон Маск аравдугаар сарын дундуур Украины дээгүүр Старлинк үйлчилгээний хурдыг сааруулсан нь Украины цэргийн ажиллагааг ноцтой тасалдуулжээ.

Карни Канадын хиймэл оюуны Кохер компани, Германы Алеф Альфа компани нэгдэхээр төлөвлөж буйг Америкийн аварга компаниудаас хамааралтай байдлыг бууруулах алхам гэж онцолсон бөгөөд Канадын засгийн газар Кохерт 1.6 тэрбум канад доллар хүртэл хөрөнгө оруулахаа зарласан. Брюссель, Оттава мөн Канадыг Европын суперкомпьютерийн сүлжээнд нэгтгэх хэлэлцээр байгуулжээ.

Удирдагчид Канадыг холбооны хамтрагч гишүүн болгох санааг дахин хөндсөн бөгөөд энэ үүргийн хүрээг 2027 оны дээд хэмжээний уулзалтаар тодорхой болгоно. Холбооны зарим гишүүн хууль эрх зүйн утгагүй ийм статус гишүүнээр элсэхийг хүсч буй бусад орныг төөрөгдүүлнэ гэж болгоомжилж байна.

Уулзалт Квебек мужид ч маргаан дагуулж, саяхан цөөнхийн засгийн газар байгуулсан салан тусгаарлагч Квебекийн намын тэргүүн Поль Сен-Пьер Пламондон холбооны засгийн газар түүнд олны өмнө үг хэлэхийг зөвшөөрөөгүй тул арга хэмжээнд оролцоогүй юм.