Канадад болох залуучуудын хоккейн дэлхийн аварга шалгаруулах тэмцээнийг шилжүүлэхийг Орос шаардаж байна

Оросын хоккейн холбоо ирэх сард Канадад болох залуучуудын дэлхийн аварга шалгаруулах тэмцээнийг хойшлуулах эсвэл цуцлахыг шаардаж байна. Оросын багийг тэмцээнд оролцуулахгүй гэж Оттава шийдвэрлэсний дараа ийм шаардлага тавьжээ.

Оросыг оролцуулахгүй бол Канадаас, магадгүй 2027 онд эрэгтэйчүүдийн дэлхийн аварга шалгаруулах тэмцээнийг зохион байгуулах Германаас ч нөхөн төлбөр нэхэмжилнэ гэж Оросын хоккейн холбооны ерөнхийлөгч Владислав Третьяк сүрдүүлжээ. Энэ тухай Оросын албан ёсны ТАСС агентлаг Пүрэв гарагт мэдээлэв.

Третьяк Москвад болсон Биеийн тамир, спортыг хөгжүүлэх Ерөнхийлөгчийн зөвлөлийн хуралдааны үеэр Олон улсын хоккейн холбооны ёс зүйн хороонд хандаж, Оростой хийх тоглолтыг бойкотлож буй үндэсний холбоодыг шалгаж, хориг арга хэмжээ авахыг хүссэн байна. “Дүрэм бий: баг мөсөнд гарахгүй бол техникийн ялагдал хүлээж, хориг арга хэмжээ авдаг. Олон улсын холбоонд гарц бий. Биднийг тоглуулах, эсвэл бид Канад руу нэвтэрч чадахгүй бол аварга шалгаруулах тэмцээнийг шилжүүлэх, огт зохион байгуулахгүй байх, эсвэл Канадын хоккейн холбоонд хориг арга хэмжээ авах” гэж Третьяк хэлжээ.

Третьяк ингэж мэдэгдэхээс нэг өдрийн өмнө Канад 10 багийн оролцоотой, арванхоёрдугаар сарын 26-нд Альберта мужид эхлэх тэмцээнд Оросын тоглогчдыг оролцуулахгүй гэдгээ баталсан юм. Спортын арбитрын шүүх өнгөрсөн сард Оросын олон улсын хоккейн тэмцээнд оролцох эрхийг сэргээсэн шийдвэр гаргасны хариуд Канад ийм байр суурь баримталжээ. Уг шийдвэрээр Орос 2022 оны хоёрдугаар сард Украин руу бүрэн хэмжээний түрэмгийлэл эхлүүлсний дараа Олон улсын хоккейн холбооноос тавьсан хоригийг цуцалсан байв.

“Украины хотуудыг бөмбөгдөөд, дараа нь соёлтой хүмүүс мэт өсвөрийнхнөө Альбертад хоккей тоглуулахаар илгээж болохгүй. Залуучуудын дэлхийн аварга шалгаруулах тэмцээнд Орос, Беларусийн баг байхгүй. Өөрсдийн тугийн дор ч, өөр ямар ч тугийн дор ч. Ингээд л болоо” гэж Канадын Ерөнхий сайд Марк Карни хатуу мэдэгджээ.

Орос оролцвол Герман болон бусад хэд хэдэн орон залуучуудын дэлхийн аварга шалгаруулах тэмцээний шинэ хуваарьт гарын үсэг зурахаас татгалзсан гэж Германы хоккейн холбооны тэргүүн Франк Луц Бундестагийн спортын хороонд мэдэгдэв. Мөн Герман бойкотын давалгааны улмаас 2027 оны хавар болох эрэгтэйчүүдийн дэлхийн аварга шалгаруулах тэмцээнийг зохион байгуулахаас татгалзах эсэхээ бодож байна.

Дараагийн тэмцээн болох 18 хүртэлх насны эмэгтэйчүүдийн дэлхийн аварга шалгаруулах тэмцээн 2027 оны нэгдүгээр сарын 8-16-нд Чехийн Острава хотод болно. Прага уг тэмцээнд Оросын тоглогчдод виз олгохгүй гэдгээ урьдчилан мэдэгдсэн байна.

Олон улсын хоккейн холбоо маргааны талаар одоогоор тайлбар өгөхөөс татгалзаж байна. Канад, Швед, Финлянд, Герман, Чех, Латви зэрэг хэд хэдэн орны үндэсний холбоо Оростой тоглохгүй гэдгээ зарлажээ. Зарим ивээн тэтгэгч ч Орос оролцвол хамтын ажиллагаагаа зогсооно гэж сүрдүүлсэн байна. Тэмцээнийг ийм хожуу шилжүүлэх нь туйлын хэцүү. Канадыг орлож зохион байгуулах өөр улс олоход ч бэрх байна.

Финлянд Оросын иргэдийг нэвтрүүлэх журмаа чангаруулжээ. Тус улс 2026 оны арваннэгдүгээр сарын 12-нд Оросын иргэд нэвтрэх нь Финляндын олон улсын харилцаанд заналхийлэл учруулна гэсэн тогтоол баталсан байна. Шинэ хязгаарлалт мэргэжлийн спорт зэрэг визээр хийх богино хугацааны ажилд хамаарах бөгөөд төвийг сахисан статустай тамирчдыг оролцуулан Оросын бүх тамирчинд үйлчилнэ.

Норвеги ч Украины дайн үргэлжилж байх хугацаанд спортын арга хэмжээнд оролцохоор ирэх Орос, Беларусийн мэргэжлийн тамирчид, тэднийг дагалдан яваа хүмүүсийг албадан гаргахаар төлөвлөж байна. Энэ алхам арваннэгдүгээр сарын 20-22-нд Лиллехаммер хотод болох FIS-ийн цанын харайлтын дэлхийн цомын эхний шатанд Москва, Минскийн оролцоонд нөлөөлж болзошгүй.

Эстони ч мөн Олон улсын цана, сноубордын холбоонд хандаж, Орос, Беларусийн тамирчид тус улсад болох тэмцээнд оролцож чадахгүй гэдгийг мэдэгджээ. Отепяа хотод нэгдүгээр сарын 18-24-нд залуучуудын болон 23 хүртэлх насны тамирчдын цанын дэлхийн аварга шалгаруулах тэмцээн болно.

Үүний зэрэгцээ Хорватын Пореч хотод арваннэгдүгээр сарын 15-24-нд болох 19-22 насны боксчдын Европын аварга шалгаруулах тэмцээнд Орос оролцохоос татгалзсан гэх мэдээлэл гарчээ. Хорватын эрх баригчид Оросын тамирчдыг туг, төрийн дуулалгүйгээр оролцохыг шаардаж, төлөөлөгчдөд виз олгохоос татгалзсан нь шалтгаан болсон аж.