Кая Каллас Сербийн сонгуулийн санал хураалтын явцад эерэг үнэлгээ өгөв

Европын холбоо Сербид 10 дугаар сарын 25-нд болсон сонгуулийг ажигласан олон улсын ажиглалтын төлөөлөгчийн газрын урьдчилсан дүгнэлтийг анхааралдаа авсан гэж Европын холбооны Гадаад бодлогын асуудал эрхэлсэн дээд төлөөлөгч Кая Каллас, Европын комиссын өргөжлийн асуудал хариуцсан гишүүн Марта Кос нар мэдэгджээ. Энэ тухай Интерфакс агентлаг мэдээлэв. Төлөөлөгчийн газарт ЕАБХАБ-ын Ардчилсан институт, хүний эрхийн товчоо, Европын парламент, Европын зөвлөлийн Парламентын ассамблей, ЕАБХАБ-ын Парламентын ассамблейн төлөөлөгчид багтсан байна.

Мягмар гарагийн орой нийтэлсэн хамтарсан мэдэгдэлд дурдсанаар, төлөөлөгчийн газар сонгуулийн бэлтгэл ажлыг ерөнхийдөө үр дүнтэй зохион байгуулсныг тэмдэглэж, санал авах байруудын дийлэнх олонхид санал хураалт явагдсан байдлыг эерэгээр үнэлжээ. Үүний зэрэгцээ эрх баригч нам төрийн нөөцийг ашиглах, хэвлэл мэдээлэл илт талцах зэрэг үндэслэлгүй давуу талыг ашигласан, сонгогчид, нэр дэвшигчид, иргэний нийгмийн төлөөллийг айлган сүрдүүлж, дарамталсан, сонгуулийн өмнөх арга хэмжээнд саад учруулсан зэрэг сөрөг хүчин зүйл сонгуулийн орчныг бүрхэгдүүлсэн гэж төлөөлөгчийн газар онцолсон байна.

«Сонгогчид ирээдүйн засгийн газарт өөрчлөлт хийх томоохон бүрэн эрх олголоо. Энэ бүрэн эрхийг бодитоор хэрэгжүүлнэ гэж бид найдаж байна» гэж Каллас, Кос нар мэдэгджээ. Тэдний хэлснээр, сонгуульд оролцсон гол оролцогчид үр дүнг шуурхай хүлээн зөвшөөрсөн нь ардчилсан үйл явцад үнэнч байгааг харуулж байгаа бөгөөд санал хураалтын дүнг албан ёсоор батлах нь засаглалыг эмх цэгцтэй шилжүүлж, парламент, засгийн газрыг аль болох хурдан байгуулах замыг нээх ёстой.

Каллас, Кос нарын үзэж буйгаар, олон улсын жишигт нийцсэн чөлөөт, шударга, ил тод сонгууль нь ардчилсан институтууд ажиллах, Серби Европын холбоонд элсэх шалгуурыг хангах зайлшгүй нөхцөл юм. Европын холбоо элсэх үйл явцын суурь асуудлууд, тухайлбал ардчиллын шалгуур, шүүхийн хараат бус байдал, хэвлэлийн эрх чөлөө зэрэг үндсэн эрхийг хангах асуудлаар Сербийн шинэ засгийн газартай нягт хамтран ажиллахад бэлэн байгаа бөгөөд нийгмийн туйлшралыг бууруулах нь нэн чухал гэж мэдэгдэлд онцолжээ.