Казахстаны банкууд жил бүр кибер халдлагад бэлэн байдлаа үнэлүүлнэ
Шинэ дүрмийн зорилго нь онлайн банк, төлбөрийн үйлчилгээний тасалдлыг хязгаарлах явдал юм.
Казахстан банкуудаас кибер халдлагад бэлэн байдлаа жилд дор хаяж нэг удаа үнэлүүлэхийг шаардах шинэ дүрэм баталсныг Таймс оф Сентрал Эйша сайт мэдээлжээ. Санхүүгийн зохицуулагч 2027 онд бүх арилжааны банкийг хөтөлбөрт хамруулахаар төлөвлөж байна.
Санхүүгийн зах зээлийг зохицуулах, хөгжүүлэх агентлаг шинэ дүрмийг 2026 оны 10 дугаар сарын 30-нд баталж, 11 дүгээр сарын 6-нд зарласан байна. Шаардлага бусад санхүүгийн байгууллагад ч хамаарна.
Үнэлгээгээр банкуудын аюулгүй байдлын төлөвлөгөөг хянаж, ажилтнууд халдлагад хэрхэн хариу үйлдэл үзүүлэхийг шалгана. Мобайл банк, төлбөрийн үйлчилгээ, харилцагчийн мэдээллийн сан зэрэг системд хиймэл кибер халдлага хийж туршихдаа харилцагчдад саад учруулахгүйн тулд хяналттай орчинд явуулах юм.
Илрүүлэх, сэргээх хугацааг хэмжиж, илэрсэн сул талыг заавал засах ёстой.
Агентлагийн мэдээлснээр туршилтын дасгалд оролцсон гурван банк бүгд мэдээллийг шифрлэсэн хиймэл халдлагын дараа нөөцөөсөө системээ амжилттай сэргээжээ.
Дотоод хэргийн яамны мэдээллээр Казахстанд 2026 оны эхний есөн сард 15 мянга орчим онлайн залилангийн хэрэг бүртгэгдсэн нь өмнөх оны мөн үеийн 19 мянга орчмоос бага байна.
Дотоод хэргийн сайд Ержан Саденов кибер гэмт хэрэгтэй тэмцэх зорилгоор Астанад НҮБ-ын Хар тамхи, гэмт хэргийн асуудал эрхэлсэн газрын бүс нутгийн төв нээхийг санал болгожээ.
